Korɛntsika reè jɔ̀naà 4 - Bible Dzùùngoo Unicode

Dzyèè rìi ni Polì ko Korɛntsika reè fi

¹ Tà doùn, mòdzian yè ɲe jàtsi kun Kirisà rè faagoofabaa ì, ko Ŋaablà re gòndo reè goojaabobaa ì.

² Tɔ̀ to y'à tàrà, nìi gaa goojaabobaà rè, tɔ̀ rii yɛ, mòò yè ɲɛn à ra.

³ Mun ne, ye kitsi kunuun mun tsɛ ò, mòò kpɛrɛ ì rìì to kitsi kunuun mun tsɛ ò, tɔ̀ na gèsɔn mun ne waa. Mun tsu to yɛ̀rɛ̀ na kitsi kun'na n yɛrɛ tsɛ tsu.

⁴ Àwà mun akir'là kpɛ̀yn na mun jààkia kàjaa pɛn tsɛ waa tɔ sààben, ŋà tɔ̀ na à kpàdèe ci mun tereòn waa. Nìi mun kitsia, tɔ Tsìfaà rìì.

⁵ Tà doùn, e maà kitsia kùnùn e waatsia jɔun waa. E maà à kùnùn, Tsìfaà nà bwey mà bà wɔɔ waa, tɔ̀ riì ye na nà, à nà tsitsii dzuun goo mɛnɛunma rèè sapɛ bo vyevyeè rà, è duungoo reè sapɛ bo da. Tɔ̀un mòdzian soo soo sapɛ wù tsoo dzi riì ka, è nà tɔ̀ tàrà Ŋaablà re.

⁶ Àwà n neema ì, ye rìì kamà, mun twɛy goo rèè ka jaa kpadey fau è ɲɛn mun yɛ̀r'la ko Apolɔsì tsɛ. Mun tɔ̀ fau gè riì ni à to, ye yè kàràn tàrà bo ɲe re è kòrò nèe gooma ree ka, nìi yɛ ci «Goo pɛn mà geren sɛbɛunmaà tsɛ waa», tɔ mà nà bà saabu ye e yɛrɛ blabe, ye sɔn fyanbe sɔn ma waa.

⁷ Àwà tsì rii wo boo dzyee rèè ɲàn ? Fee rìì ni wo re, wo na nìi tàrà è bo Ŋaablà re ? Wo to ye ba à tàrau, feera wo y'à yɛrɛ blabee a ci wo na à tàrà waa ?

⁸ Ye cɛun tàr'là rà nòn, ye bàu gètsi ì nòn. Ye màsàbee dzii kuun, ɲe bɛy. Ye yè bà na baɔ̀ màsà ì sààben na ɔ, ɲe sa fa ni ba màsa ì ye ka ɔ !

⁹ Àwà m'a jàa ci Ŋaabla ɲe kɛɛradzin neè bàu bònè dzin ì, a ci à san ka kitsi mɛrɔɔn nìì reè tsɛ. È ɲɛn à tsɛ, ɲe bàu siin faa ge ì dziɲan re, mɛ̀rɛ̀kɛ sen ɲɛn adamàdzin mòdzin ì tsɛ.

¹⁰ Kirisà kamà, ɲe fàkɔɔn ì, ye yè bà akirima ì. Ɲe fààn bɛy ì, ye ye bà fààntsi ì. Bla wɔɔ̀ ye ɲan, ɲe yè bà kɔɔ̀n.

¹¹ È bè suu fɔ nèe waatsi ree dzu, ɲe ni dzuà ko mìnoò rà, à na vya ɲe mà, ɲe kuun'n kuru ɲaan faɔ̀, ɲe yè bà tsyeere beè min niì sapɛ.

¹² Ɲe byɛɛn, ɲe yè faagoò fa e yɛr'la sià ka. È ɲe ɲɛ̀ɛn, ɲe yè dzwɛ ji è ra, è ɲe byɛɛn, ɲe y'à tsi e ma.

¹³ È ɲe tsoo bar'la, ɲe y'à latsi gooma dzi ka. È bè suu she dzu, ɲe baɔ̀ dziɲaan ɲɔ̀ùn neè, dziɲaan gè nooŋmaà sapɛ.

¹⁴ Mun na twɛy goo rèè sɛbɛɛn m'a ka ye seey waa, ŋà min sɛbɛɛn rìì m'a ka ye sɔ̀nmin, a ci mun dzin kɛ̀niunma rèè.

¹⁵ Àwà, arì kàrànfa gbaakoron tsyeùn nì yè bà na ni ye re Kirisà ɲàn, fà giri na ni ye re waa. Kùnàgoo Dziɔ̀ baraka rɔ̀n, mun nì ye kereu Yesù Kirisà ɲàn.

¹⁶ Tà doùn, mun ye màxɔ̀ɔn, ye bà mun shɔ̀ùnminanbaa ì.

¹⁷ Tɔ̀ rii kamà, mun Tsìmotè kaà ye re, mun dzin kpiri kɛniunmaà, è bà vusootsi Tsìfaà ɲàn. Mun yè n ne jaamabee shi jiɛ nìi tsuru Kirisà ɲàn, a ci mun y'à kàr'na nìi tsuru min niì sapɛ, ɲɛynamoo kur'lèè sapɛ re, à nà ye taa to tɔ̀ re.

¹⁸ Àwà, swey y'à kɛ̀sɛɛ̀ nìi fa ci mun na naà wɔ ye re mɔn waa, tɔ bàu saabu twɛy yè e yɛrɛ blabe.

¹⁹ Ŋà è ba Tsìfaà sàò, sani dɛyn, mun nà bè ye re mɔn. Min wɔ mɔn, twɛy nìì reè blà e yɛr'le, è dzugoomaa nìi, mun fa à gaa min tɔ̀ tɔ̀ waa, fɔ è dzia nìi fa.

²⁰ È ɲɛn à tsɛ, Ŋaablà re màsàbee na gooma na goo waa, ŋà à dzibaabe goo rii.

²¹ Ye gaa feera do ? Min bè kɔ̀n nì ka e kpɛyn gbɛ, tàà min bè kɛ̀nbààbe ko vununmacin nì ka ?

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ