အွန်လိုင်း သမ္မာကျမ်းစာ

Korɛntsika reè jɔ̀naà 2 - Bible Dzùùngoo Unicode

Polì ci wo Kirisà gooma deu dèù'n kur'liì rà Korɛntsika reè rà

¹ Àwà neema reè, mun bèu ye kpà waatsi riì bwèy, min bè Ŋaablà re gòndoo gooma de ye ra, mun na be gooma tɔ brisi ka, mun to na be akiritsifabe ka.

² È ɲɛn à tsɛ, è mun to ye fi, mun na à gaa min goo sɔn pɛn tɔ̀ fɔ Yesù Kirisà, Yesù Kirisà gbaunma gɔɔ̀ rà.

³ Tɔ̀ rii y'à to, mun bèumaà ye re mɔn, mun ŋɔ̀n na fyɛn, mun shiɔ̀, mun mà yè bà sɔ̀ɔn a ci goo kpɛ̀rɛ̀.

⁴ Àwà mun ne goomaa, ko mun ne waajibia, à pɛn naà adamàdzin mòdzin ne akiritsifabee gooma tɔ waa, ŋà à sapɛ na goo kpàdèkɔɔn dzibaabe ka, Ŋaablà re Dzia baraka rɔ̀n.

⁵ Tà fau, gè riì ni à to, ye re ɲɛynaà mà gban adamàdzin mòdzin ì nè akiritsifabe tsɛ waa, ŋà è ba ni Ŋaablà re dzibaabee rìì tsɛ.

Ŋaablà raa akiritsifabee

⁶ Tɔ̀ to y'à tàrà, ɲe sa akiritsifabee sɔn ni gooma deè ɲɛynamoo mɔ̀unma rèè rà, akiritsifabe riì na nèe dziɲan ree raa waa, à to na nèe dziɲan ree kùntsii rèè raa waa, twɛy dò boò peu.

⁷ Ŋà Ŋaablà raa akiritsifabee, ɲe tɔ̀ rii gooma deè. Tɔ̀ akiritsifabee na gòndo mɛnɛn tsùuŋma, Ŋaabla na nìi ŋɛ̀nɛ̀ɲaɔ̀n sani dziɲan ye ɲɛn, è bà ni à ka nɔɔrɔ ɲɛn ɲe tsɛ.

⁸ Dziɲan ree kùntsii rèè pɛn na tɔ̀ akiritsifabee tɔ̀ waa. È ɲɛn à tsɛ, yè ba na à tɔ̀un, è fa ni nɔɔrɔɔ̀ Tsìfaà gban gɔɔ̀ rà waa.

⁹ Ŋà, à sɛbɛɔ̀n Ŋaablà re Gooma doùn nèe tsuru ci: «Mòdzin jaa na ɲɛn ja gè niì mà ŋe, à toro to na à myɛ̀n jà ŋe, à to yɛ̀rɛ̀ na jaà jà à akir'la ŋe tsu, Ŋaabla tɔ̀ rii sɔ̀n byɛ̀n tsùuŋnà e kɛnbaa rèè rè.»

¹⁰ Àwà Ŋaabla tɔ̀ goò kpàdeu ɲe rìì là e re Dzia baraka rɔ̀n. È ɲɛn à tsɛ, Ŋaablà re Dzia goò sapɛ ɲan siɛ̀n, arì Ŋaabla re gòndo niì reè tsun.

¹¹ Tsì rii soo ni adamàdzin mòdzin neè ɲàn, ci wò y'a tɔ̀ nìi ni adamàdzin mòdzin ɲan fɔ akir'lìi ni à tsìfa ɲan ? Tɔ̀ soo tsuru, nìi ni Ŋaablà ɲan, mòò pɛn na dzia tɔ̀ tɔ̀, fɔ à re Dzia.

¹² Àwà nìi ɲe, ɲe na dziɲan raa dzia tàraɔ̀ waa, fɔ Dzi riì boo Ŋaablà re, gè riì ni à to, Ŋaabla kwɛ̀yge nìì reè siɔ̀n ɲe ra, ɲe yè twɛy tɔ̀.

¹³ Ɲe na twɛy goo rèè dèe gooma ì ka, nìi adamàdzin mòdzin ne akiritsifabee kàràn waa, fɔ Ŋaablà re Dzia nìi kàr'na. È ɲɛn à tsɛ, ɲe rìì xɔɔn raa goò dèe xɔɔn raa gooma ì ka.

¹⁴ Adamàdzin mòdzin maanaa na e tsiɛ Ŋaablà re Dzia raa goo rèè rà waa, kàtsu tɔ fàkɔ̀ɔ̀nbe rii à jaa ra. À na dzia è tɔ̀ waa, è ɲɛn à tsɛ, Ŋaablà re Dzia soo pe rii y'à toò, yè tɔ̀ bo e si ɲan.

¹⁵ Ŋaablà re Dzia ni mòò riì ɲàn, tɔ goò sapɛ tɔ bo e si ɲan, ŋà mòò pɛn na à raa rèè tɔ̀ bo e si ɲan waa.

¹⁶ Àwà à sɛbɛɔ̀n Ŋaablà re Goomaa doùn ci: «Tsì rii dziu Tsìfaà kɛ̀sɛmàà tɔ̀, è bà ni kàràn sìn à ra ?» Tɔ̀ to y'à tàrà, Kirisà raa kɛ̀sɛmàà ni ɲe re.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ