အွန်လိုင်း သမ္မာကျမ်းစာ

Korɛntsika reè jɔ̀naà 16 - Bible Dzùùngoo Unicode

Polì nìi dèu Yerusalɛmùn ɲɛynamoo kur'là dzwɛ̀mà goo tsɛ

¹ Àyìwà, nìi sitɛy goo raa kàjaa, tɔ̀ niì wù è bè sìn Ŋaa re mòdzin neè rà è ka è dzwɛ̀ma, mun shi niì reè kpàdèu Galatsi mar'la ɲɛynamoo kur'lèè rà tɔ̀ kàjaa tsɛ, e sa y'a shi jiì tɔ̀ tsuru.

² Shikuan jisee jɔna sapɛ, e soo sookɔɔn sa yeè ɲɛɛn sɔn bo tsùù e taàkuùn e sa ko e bɛrɛ, gè riì ni à to min wɔ mɔn, ɲɛyn ladzyee goo mà jà à ɲan dɛ.

³ Min be wɔ mɔn waatsi riì bwèy, ye ɲɛɔ̀n nìì reè rà, mun nà twɛy ka ko sɛbɛn ì ka, yè bè ye re kwɛ̀yge rèè ka Yerusalɛmùn.

⁴ È be to ci mun yɛ̀r'la sa wù min bè, è dzia bè ko mun ka.

Pol'lè goo farama kpɛrɛkuru ì

⁵ Mun nà dɔ̀n Maseduwanin mar'la ɲàn, min wɔ ye re mɔn. È ɲɛn à tsɛ, mun nà Maseduwanin mar'la fi shɛn dɔ̀n.

⁶ Gè sɔ̀n ge mun nà to ye ka mɔn min waatsi dɛyn fa, arì mùnkɛɛ̀ waatsia sapɛ, gè riì ni à to, ye mun dzwɛ̀ma n ne jìɛ̀ dzyee doùn min dzi wɔ n wɔmà.

⁷ Àwà, nèe sàn nèe ɲan, mun na ni à re mun dɔ̀n bokɔɔn bàsɔùn yè ye jà waa, mun ni à re sa min waatsi dɛyn fa ye ka, Tsìfaà ye e tsiì à ra.

⁸ Ŋà mun nà to Efɛsì wɔ̀ rɔ̀n, fɔ Pantekɔtsi sɛr'la waatsi yeè bè wɔ.

⁹ È ɲɛn à tsɛ dzii bla saɔ mun ne tɔ̀ gàneè ɲàn è kòrò ko mun ne faagoò ka, ɲan rèè sa to yè bà giri.

¹⁰ Tsìmotè ye wɔ mɔn, e maà à to goo sɔn pɛn y'à shi e fi mɔn waa, kàtsu à sa Tsìfaà rè faagoò faa a ci mun.

¹¹ Mòò pɛn mà à ɲanfyɛnbe waa. Ye wɔ à ra y'a kèèsen e re jìɛ̀ doùn è sèè wɔ n tsɛ xɛɛrɛ ra, kàtsu mun y'à ko neema dzyee reè sa mashua.

¹² Nìi Apolɔsì, mùn neema kpir'la, mun tɔ̀ màxɔ̀un cɛyn, à ko neema reè yè bà ni be bo ye kpà, ŋà dòònuùn kpɛ̀yn, à sàò na n'a re è bè waa. È na waatsi tarà, à nà bè.

¹³ Ye to e jaa ra, e san gbaunma yè to ɲɛynaà ɲàn. Ye bà kpiri ì, fààn ye bà ni e ɲan.

¹⁴ Ye goò sapɛ fa ko kɛ̀nbààbe ka e fi.

¹⁵ Àwà neema reè, y'a tɔ̀ ci Sitefanasì ko e re mòdzìnbee rìì bàu Akayi mar'la ɲɛynamoo jɔ̀na rèè, è to yè e shiu faagoò rà Ŋaa re mòdzin neè rè. Tà doùn mun nà nìi gaa ye re, tɔ̀ rii yɛ,

¹⁶ ci ye e majàà twɛy mòdzìn tsu rèè rè, ko nìì reè sapɛ faagoò faa ko è ka, yè bà ni tɔ̀ faagoo xɔù soo rà.

¹⁷ Sitefanasì, ko Fɔritunatusì, ko Akayikusì nàuma bo mun kpà, tɔ mun taama dzibeò fɔ è bè geren. È ɲɛn à tsɛ ye na ni niì fa waa, è tɔ̀ kɔ̀ɔ̀ tsyeeŋ mun ne.

¹⁸ Àwà è mun akiri tsùuŋ, yè ye sa akiri tsùù. Twɛy mòdzìn tsu rèè, ye è nàfaà tɔ̀.

Pol'lè tswɛ̀y làtaan

¹⁹ Azhi mar'la ɲɛynamoo kur'lèè ye tswàa. Akilasì ko Pirisiyì sa ye tswàa cɛyn Tsìfaà ɲàn ko ɲɛynamoo kur'lìi yè e ladzyèe è re tsii rɔ̀n.

²⁰ Neema dzyee reè sapɛ ye tswàa. Ye e si tswà kɛ̀nbààbè tswɛy ka.

²¹ Nèe mun Pol'lè tswɛ̀y, mun yɛ̀r'la sià nìi sɛbɛɔ̀n.

²² Tsìfaà goo ma ba dzi mòò riì rà, tɔ̀ yeè bà dangaɔ̀. 'Màrànatà', nìi dzuɔn: nà, Tsìfaà !

²³ Arì she, mùn Tsìfa Yesù ɲanwùɔ yè bà ni e tsɛ !

²⁴ Yesù Kirisà ɲàn, mun ye sapɛ kɛniɔ̀n.

« အရင်

နောက်တစ်ခု »

Wycliffe Bible Translators, Inc.

ကြှနျုပျတို့နောကျလိုကျပါ:

ပံ့ပိုးပေးထားသော လင့်ခ်များ

ကြော်ငြာတွေ