ZEPHANIAH 3 - Bawm Common Language Bible Version

Jerusalem Sualnâk Leh Tlanhnâk

¹ Jerusalem râwk hen um mi, mah minung tla nehsawhtu khuapi chu a vânduai rawh.

² LALPA thu a ngâi duh lo le, a nunsimhnâk khawm a pawm lo. LALPA sinah a ngauh hen ṭangpinâk khawm a deih lo.

³ A rianṭuantu tla chu chakeibaknei hûk mi hâwi an si, a lâirêltu tla chu chingngia râwlṭâm tla nih zînglei rang khawm ah an hamkah ruangah ruh an zuah kho lo mi hâwi an si.

⁴ Khuavâng tla nih zeikhawm pawisak an nei lo hen zumhkâilo hen an um le, bâwlpu tla nih thil thenhlimh an nawmh. Pathian dân chu anmah lâwknâk ah an mang.

⁵ Sikhawmsele LALPA chu khuapi sungah a um ko le, thildik a ti le, thil diklo chu a ti dahlo. Zîng siar hen a mi le tla sinah thildik a ti, sikhawmsele chunah mireplo tla nih thil diklo an ti kumza.

⁶ LALPA nih, “Phun zawzawng ka veih na rawh, an khuapi tla ka veih le, an khua kulh leh an in sâng tla khawm ka râwk rawh. Khuapi tla khawm a karo hen a um le, khua lâi tla khawm a king le, lâwng keng hen âukhawm an um lo.

⁷ Churawhchun, ka mi tla nih an hawng ka zah lai rawh le, ka nunsimhnâk khawm an pawm hen ka sîntir na mi khawm an philh lai lo ti ka ruat. Sikhawmsele a lân a mi hâwitê hen ṭhalo tak hen an um nawlh sawm fâwn.

⁸ LALPA nih, “Ngâk râm rih le, phun tla ka phiar na ding ni chu ngâk ko rih. Ka thinthawknâk theihtir na ding hen phun tla leh lalram tla pumh na ding ka tum. Ka thinrunhnâk mei hen tual pumpi ka veih awt.

⁹ “Churawhchun, phun tla lakah minung tla chu an umdân ka dangtir lai le, pathian dang sawnhlo hen keimah cho an hawng ka sawnh lai rawh. An ektê hen an hawng ka lung hep lai rawh.

¹⁰ Ram lât takah Sudan ah ka mi rekrâwi hen um mi tla khawm nih ka sinah thil ap ding an hawng put lai.

¹¹ Chu tik chun, ka mi tla, ka lakah nan hel mi kha ningzakkâi tak hen nan um lai lo rawh. Mi â zûm mi leh â khâwng mi tla chu ka veih ver na lai le, ka tlâng thenhlimh ah âukhawm ka lakah nan hel lai lo rawh.

¹² Mi thinlung nâu leh niam tak, ka sinah ṭangpi duh hen hawngtu cho chunah ka siah na awt.

¹³ Israel a thibang tla nih chun âu sin khawm ah thil diklo ti hen âwkrâwl thu an sim lai lo le, perpet ding an tum lai lo. Sul-le-lam tluang leh him tak hen an um lai le, âukhawm ṭih an nei lai lo,” a ti.

Lâwmnâk La

¹⁴ Israel mi tla, lâwm hen la sak hen âu u! Jerusalem, na thinlung zawzawng hen a lâwm rawh!

¹⁵ LALPA nih an rêp na mi a dawngtir rawh, nan mêlma tla khawm a kiangtir ver rawh. LALPA, Israel Pathian chu nan sinah a um le, tu chun zeikhawm ṭih ding a um lo rawh.

¹⁶ Jerusalem sinah, “Zion khuapi, ṭih lah! Na kut kha thlâi thlo lah! Nan ti ding mi tik chu a tlung rawh.

¹⁷ LALPA, nan Pathian chu nan sinah a um le; a thiltikhonâk nih nehnâk an pêk na. LALPA chu nan lakah â lâwm lai le, amah dâwtnâk ah nunchan thar a nan pêk na lai. Nan tlûnah la sak hen â lâwm lai.

¹⁸ Kût ni khua ah mi tla anna lâwm mi hâwi hen,” a ti. LALPA nih, “Vânduainâk ah nehsawh hen nan um mi leh mualpho hen nan um mi chu ka dawnghtir hen ka lâk ving rawh.

¹⁹ Nanmah nehsawhtu tla ka rêp na ding mi, mikhêng tla ruang ka suah na ding mi leh saltâng tla in leiah ka tlungtir ding mi tik chu a tlung rawh. An mualphonâk chu zahkâinâk ah ka changtir lai le, laikulh mi zawzawng nih an sawr na lai.

²⁰ Rekrâwi hen um mi tla in leiah ka tlungpi na ding mi leh laikulh pumpi ah min thang tak hen ka nan siam na ding mi leh sul-le-lam tluang tak hen kan umtir ding mi ni chu a tlung rawh!” a ti. LALPA nih a sim mi asi.