ZEPHANIAH 2 - Bawm Common Language Bible Version

Rim Ding Hen Ngiarnâk:

¹ Zak theihlo phun,

² chawmpâr hâwi hen na uai hen na thih lânah, LALPA thinthawknâk khanghtu mei nih a nan khangh lânah, a thinrunnâk a langhtirnâk ni a tlung lânah theihthiamnâk nei rawh.

³ Nannih LALPA thupêk ngâi hen nâu tak hen ram lakah um mi zawzawng tla, LALPA leiah a hawi u. LALPA lakah nâu tak hen um ule, thil dik ti u. LALPA nih a thinrunhnâk a hawng langh ni ah rêp nan âwl kekkawk lai mawh.

Israel Kiangkam Mi Phun Tla Vânduainâk

⁴ Gaza khuapi mi tla pakhat khawm an him lai lo. Askelon chu a karo hen a um lai. Asdod mi tla chu sûnlân karah nar phin an si lai le, Ekron mi tla chu an khuapi lakah mi nar an si lai.

⁵ Nannih Philistia mi tla, nan vânduai rawh. LALPA nih rêpnâk a hawng tlungtir, pakhat khawm âklo hen nan vei dep lai.

⁶ Tipi kapah na ram chu phâisen asi lai le, chunah chun dawrâpu basâ leh dawrâ in tla a um lai.

⁷ Juda thibang um tla nih, na ram chu an luah lai. Chunah an dawrâ tla an tlawngtir lai le, Askelon khua mi in ah an riak lai. LALPA an Pathian chu an sinah a um lai le, sul-le-lam tluang hen a siam nawlh na lai.

⁸ LALPA Zeizawng tikho nih, “Amon leh Moab mi tla nih ka mi tla an ram lâk piak na ding hen an zauhnawmh hen an siar na lo ti ka theih.

⁹ Kei, Israel Pathian nung tak kasi ruangah Moab leh Amon chu Sodom leh Gomorah hâwi hen ka veih na awt ti ka tiam asi. Chitê khur ah â chang lai le, belh nih khuh dep hen a râwk kumza lai rawh. Ka mi a thibang tla nih an ram chu rûn hen an lâk piak na lai.

¹⁰ Hi hâwi hen Moab leh Amon tla, LALPA Zeizawng tikho minung tla zauhnawmh hen siarlotu tla chu rêp hen an um lai.

¹¹ LALPA nih annih tla chu a lauh na lai, tual a mi pathian tla chu zeikhawm lo ah a siam lai le, amah Pathian tak chu phun kip nih mah ram chiau ah an sawnh lai.

¹² LALPA nih Sudan mi tla khawm chu a thah bâk na lai.

¹³ Asiria tla veih na ding hen LALPA nih a thiltikhonâk a mang lai. Ninevi khua chu ramkaro râwk rawh mi tî umlonâk mun khuapi ah a siam lai.

¹⁴ Ranrual tla, ran tla, ramsa chi kip an bawk lai. Chu râwknâk mun ah chun sûmbuh tla an um lai le, langawtkawt lakah an âwn lai. Kawtkâ kâinâk bak ah langâk tla an âwn lai. Sidar thing hen sak mi in tla chu râwk dep hen a um lai.

¹⁵ Chu hâwi hen khuapi mah thiltikhonâk hen zûm mi leh him ziar ding hen â ruat mi tlûnah thil a hawng tlung lai. A sungah minung tla nih an khuapi chu laikulh ah rokual chem hen an ruat. A karo hen um ding mi mun ramsa tla umnâk mun a hawng si lai le; a paltu tla zawng chu an thlingza rê lai.