ZEKARIA 9 - Bawm Common Language Bible Version

Kiangkam Phun Tla Tlûnah Lâirêlnâk

¹ LALPA thuchah chu hi hi asi: Hadrak ram leh Damaska khuapi rangah rêpnâk ding hen thu a thlûk. Israel phun tla cho silo hen LALPA tâ Siria khuapi khawm asi ber.

² Hadrak ramrî mi Hamat khawm a tâ asi le, churuang chun Tura khuapi tla leh Sidon khuapi lak khawm ah an thil thiamnâk zawzawng hen an tikho rirî hen an ti.

³ Tura chu amah rangah kulh a siam le, ngûn leh tangka chu pawng hen um khawmsele, nâwmtâm hâwi cho asi.

⁴ Sikhawmsele LALPA nih a neih zawzawng a lâk piak hep lai. A neih chu tipi ah lawnh asi lai le, khuapi chu duah asi lai.

⁵ Askelon khuapi nih chu chu a muh lai le, a lâu lai. Gaza khuapi khawm nih a muh lai le, fâk tak hen a tuar lai. Churuangah Ekron leh a lungumnâk tla zawzawng chu a râwk ver lai. Gaza nih a lal a thlâu ving lai le, Eskelon chu a karo hen siah asi lai.

⁶ Asdod ah chun phun châwm nuk hen an um lai, LALPA nih, “Hi bang Philistia mi zûm tla hi nâu tak hen ka siam hep na awt.

⁷ Chunah chun sa chu thisen tel hen an ei lai lo le, khap mi buh dang khawm an ei lai lo. A thibang zawzawng tla chu ka mi le murui khat an si bâk lai le, Juda phun lakah mi hâwi an si bâk lai. Ekron a mi khawm Jebus mi an si hâwi hen ka mi tla an si bâk lai.

⁸ Ka ram chu kawrsen tla nih pal lo ding hen ka vêng lai, mi ṭhalo tla nih ka mi tla nehsawh ding hen ka siang lai lo rawh. Ka mi tla nih an tuar dân chu ka muh rawh,” a ti.

Mâilei Ding Mi Lal

⁹ Zion mi tla, a lâwm u, a lâwm u! Jerusalem mi tla, lâwm hen âu u! Zauhnik! Nan lal chu nan sinah neh hen leh nehtu si hen a hawng kal le, nâu tak hen sanatung fa tlûnah â chuan.

¹⁰ LALPA nih, “Israel lakah mi râltuknâk kari tla chu ka ṭhial lai le, Jerusalem a mi rang tla chu ka lâk ver lai le, râltuknâk chanhtiang tla chu ka râwk hep lai. Nan lal nih phun tla lakah thlangamnâk a siam lai le; khatlei mi tipi thawk hen khatlei mi tipi tiang Eufretis tiva thawk hen tual dawnghnâk tiang lâi a rêl lai,” a ti.

Pathian Mi Tla Dirh Nawlhnâk

¹¹ LALPA nih, “Bâwlnâk thisen hen nan sinah thudân ka tuk ruangah, nan mi tla chu ti umlonâk ah khua sungah sal an tâng mi chu ka suah na lai.

¹² Nannih saltâng, tuah lungumnâk neitu tla, nan mun ah him tak hen hawng kîr u. Nan tuar mi ruangrûl ah a lehnih ngâk a tam malsâwmnâk kan pêk na ding mi tuah kan simh na lai.

¹³ Juda chu chanhtiang kûk ah ka siam lai le, Israel chu a thalzum ah ka siam lai. Greek mi tla do ding hen Zion mi tla chu nâmsâu hâwi hen ka mang na lai.

¹⁴ LALPA chu a mi le tla tlûnah a hawng a langh lai le, mîmthlalek hâwi hen a thalzum tla chu a kah lai. LALPA Zahkâi nih tâwtawrâwt a tum lai le, simlei thawk hen thlipi lakah a kal lai.

¹⁵ LALPA Zeizawng tikho nih a mi tla chu a hum na lai le, an mêlma tla chu an veih na lai rawh. Zurî hâwi hen râltuknâk ah chun an âu lai le, bâwlnâk thisen mâichâm tlûnah khêng lakah mi an thlêt le, a luang mi hâwi hen an mêlma tla thisen an luangtir lai.

¹⁶ Chu ni chu a hawng tlung tik chun LALPA nih a mi tla chu dawrâpu nih ṭihnungkâi lakah a dawrâ tla ruang a suah mi hâwi hen ruang a suah na lai. Lallukhuh lakah mi lungsung hâwi hen a ram lakah an chêu teh lai.

¹⁷ Chu ram chu â dawh hen a ṭha awt chiam e! Seino tla chu an fâng leh an uain tla chenh hen chak tak hen an ṭhang lai.