ZEKARIA 5 - Bawm Common Language Bible Version

Langhnâk Ah Lasuibu Zual A Zuang Mi

¹ Ka hawi nawlh le, tutan chu lasuibuzual vân leiah a zuang mi ka muh.

² Vânmifial nih zei na muh ti hen hawng ka deih. Kei nih ka sâng le, “Vân leiah lasuibuzual a sâu lei feet sâwmthum a lianh lei feet leinga a zuang mi ka muh,” ka ti.

³ Churawhchun, anih nih, “Chu lakah chun, ram pumpi tlûnah siat kal ding mi â rîn. Lasuibuzual sîr khatlei nih chun, ‘Ram lakah mifîr zawzawng tlâutir hep an si lai’ ti a sim, khatlei sîr nih chun ‘Âwkrâwl hen siat tleihtu vial chu lâk phin asi lai’ ti a sim ber.

⁴ LALPA Zeizawng tikho nih chun misual leh mifîr âwkrâwl hen thutiamtu in kip ah hi siat hi ka fial awt ti a sim. An in tla lakah a châm thlo lai le, râwk dep hen a siam na lai,” a ti.

Langhnâk Lakah Bâwm Sungah Nunau A Um Mi

⁵ Vânmifial chu a hawng a langh nawlh le, “Zauh! Thil dang a hawng um nawlh fâwn!” a ti.

⁶ Kei nih, “Zei me?” ti hen ka deih. Anih nih a sâng le, “Bâwm asi le, ram pumpi sual ruangah a um mi asi,” a ti.

⁷ Chu bâwm sinh chu suan hen siam mi asi. Ka zauh ko liauah chu a sinh chu â awng le, chu bâwm sungah chun nunau a to ko!

⁸ Vânmifial nih, “Hi nunau nih sualnâk a zauhtir,” a ti. Chu nunau chu a thlûk le, a sinh.

⁹ Tlûnlei ka zauh le, nunau panih keimah leiah vachâ thlâ hâwi mi thla chak put hen an hawng zuang. Chu bâwm chu an hawng châwi le, an zuangpi ving.

¹⁰ Churawhchun, kei nih, vânmifial sinah, “Zei lei me an kalpi?” ti hen ka deih.

¹¹ Anih nih a sâng le, “Anmah rangah Biakin an saknâk ding Babulon ram leiah an kalpi, chu Biakin chu an sak dih chun chu bâwm chu sawnh ding hen chunah chun an siah lai,” a ti.