ZEKARIA 3 - Bawm Common Language Bible Version

Khuavâng Langhnâk Muh Mi Lakah Bâwlpu Lian

¹ Langhnâk dangah LALPA nih Bâwlpu Lian Josua LALPA vânmifial mâika ah a dîr mi hawng ka muhtir. Chunah chun Josua kiangah amah phiar ding hen Setan chu tîm zet hen a dîr ko.

² LALPA vânmifial nih Setan sinah, “Setan, LALPA nih an mawhtir seh! Jerusalem zângfahtu LALPA nih an mawhtir seh. Hi minung hi mei lakah mi ṭhianṭhunh thur zawk mi hâwi asi,” a ti.

³ Josua chu chunah chun, puan bâl tak aih hen a dîr ko.

⁴ Vânmifial nih chun vânminung um mi tla sinah, “Hi minung nih puan bâl tak â aih mi hi lît piak u,” a ti. Churawhchun, Josua sinah, “Na sualnâk chu ka lâk ving rawh le, puan thar aih ding ka nan pêk lai,” a ti.

⁵ Churawhchun, vânminung tla sinah chun, Josua lû ah upâwng thiang tak pawnh ding hen thu a pêk; chu hâwi hen an pawnh le, chunah vânmifial a dîr liauah puan thar an aihtir rawh.

⁶ Churawhchun, vânmifial nih Josua chu LALPA Zeizawng tikho thusim chu a simh,

⁷ “Ka dân na zûl hen thilti hen ka nan ruat mi na ti chun, ka Biakin leh a kulh sung lakah thuneitu na si kumza lai le, ka mâika mi vânmifial thlachamnâk ka ngâi mi hâwi hen nang thlachamnâk khawm ka ngâi lai.

⁸ Nang Bâwlpu Lian Josua ngâi rawh, a hâwi bâwlpu tla, mâilei ṭhatnâk ding hen ruat mi tla ngâi u: Ka to-aw ṭeng ti hen min sak mi chu ka hawng langh awt!

⁹ Josua mâika ah lung pakhat pat sarih nei mi ka siah, chu lakah chun thu ka rîn lai le, ni khat kar lakah hi ram ah sual chu ka lâk phin lai.

¹⁰ Chu ni a hawng tlung tikah mikip nih nan inpa thlangam leh rem tak a um hen theipi leh grep nih an kulh dak mi ruangah a lâwm ding hen nan sâwm na lai,” a ti.