ZEKARIA 2 - Bawm Common Language Bible Version

Langhnâk Ah Muh Mi Tahnâk

¹ Langhnâk dangah mi pakhat nih tahnâk a put mi ka muh.

² “Zeilei na kal awt mi me?” ti hen ka deih. “Jerusalem zei tluk a sâu, zei tluk a kâu ka tah awt mi,” ti hen hawng ka sâng.

³ Churawhchun, hawng ka sawnhtu vânmifial chu a mâilei kângah a kal le, vânmifial dang amah tawng ding hen a hawng mi ka muh.

⁴ A masa dauh nih a dang sinah, “Tek le, tahnâk puttu chu minung leh ranrual Jerusalem ah a tam thlo ruangah kulhnei ding hen a lian tuk lai,” ti hen va simh.

⁵ LALPA nih, chu khuapi chu vêng ding hen amah ngelchel chu kulh dak hen mei kulh vâm hâwi hen humtu si hen, a rokualnâk zawzawng hen ka um awt ti hen a tiamh,” a ti.

Sal Tâng Tla In Leiah Tlung Ding Hen Kawh Hen An Um

^6-7 LALPA nih a mi tla sinah, “Munkip ah ka nan rektir na le, sikhawmsele tu chun nannih sal ah tâng mi tla, Babulon ram ah mi suak ule, Jerusalem leiah kîr rawh u.

⁸ Nannih vuaktu chu ka thil neih sung chem vuaktu asi,” a ti. LALPA Zeizawng tikho nih chun a mi tla rûntu phun tla sinah hi thuchah hi sim ding hen hawng ka fial.

⁹ “LALPA amah tak chu nanmah dotu asi lai le, nan to-aw si rawh mi tla nih an rûn na lai,” a ti. Hi bang tla hi a hawng tlung tikah mikip nih LALPA Zeizawng tikho fial mi kasi ti an theih lai.

¹⁰ LALPA nih, “Jerusalem mi tla! Nan sinah um ding hen ka hawng ruangah lâwm hen la sak u! ” a ti.

¹¹ Chu tikah chun phun tam tak LALPA sinah an hawng lai le, a mi tla an si lai rawh. Nan sinah a um lai le, kei khawm amah fial mi kasi ti nan theih lai rawh.

¹² Juda chu LALPA ram thenhlimh ah a bîk hen amah tâ an si nawlh lai le, Jerusalem chu khuapi dang zawzawng ngâk hen a dâwt chem mi asi lai.

¹³ LALPA chu a mun thenhlimh thawk hen a hawng awt ruangah mikip a mâika ah dâisip hen um u.