ZEKARIA 13 - Bawm Common Language Bible Version

¹ LALPA Zeizawng tikho nih, “Chu tikah chun, David thlâk leh Jerusalem a mi chu an sualnâk leh milem an sawnhnâk tlenh ding hen tinungva ka suaktir awt.

² Chu tikah chun ram lakah milem min chu ka veih ving lai le, âukhawm nih an theih lai lo rawh. Khuavâng kasi titu zawzawng chu ka thliar lai le, milem sawnh duhnâk khawm ka veih ving lai.

³ Âuzawng thu sim nget rihtu chu âwkrâwl thusim hen LALPA thu ka sim ti a ti ruangah a nu leh a pa nih thah ding mi na si an ti lai. Thu a sim liau takah a nu leh a pa tak nih thi thlo an sunh lai.

⁴ Chu tikah chun khuavâng âukhawm langhnâk muh ruangah anna zûm lai lo rawh le, mi tla hum ding hen khuavâng thuam hen khawm anna thuam lai lo.

⁵ Chu hâwi ngangâk hen ‘Khuavâng kasi lo; kei phâisen nâwntu kasi le, ka damsung zawzawng phâisen tuahtu kasi,’ a ti lai.

⁶ Mi âunih mawh, ‘Na thinmakâ ah na liam mi mâ kha zei zia mesi? ti hen an deih lai le, anih nih a sâng lai le, ‘Ka hâwipa in ah ka liam mi asi,’” a ti lai.

Pathian Dawrâpu Thah Ding Hen Thupêk

⁷ LALPA Zeizawng tikho nih, “Nâmsâu, thawk le, ka rianṭuantu dawrâ vêngtu chu do rawh! Thah le, dawrâ chu anna rek phin lai.

⁸ Ram pumpi ah mi ka mi tla chu ka do na lai le, a mun thum ṭhen hen mun nih chu an thi lai.

⁹ Churawhchun, a mun thumnâk a thibang chu mei nih tangka a thiangtir mi hâwi hen ka thiangtir lai. Ngûn nik mi hâwi hen ka nik na lai. Churawhchun, ka sinah thla an cham lai le, ka sâng na lai rawh. Ka mi le an si ti ka simh na lai le, annih khawm nih kan Pathian na si an hawng ka ti bâk lai rawh,” a ti.