ZEKARIA 10 - Bawm Common Language Bible Version

Suah Na Ding Hen LALPA Thutiam

¹ Ṭhal ah ruah sûr ding hen LALPA rangah deih u. Mikip rangah ruah sûrtir hen phâisen ring dul tirtu chu LALPA asi.

² Mi nih milem leh chamchawh thiam tla sinah thu an deih le, sikhawmsele sângnâk an tawng mi chu âwkrâwl leh zeikhawm lo mi asi. Mi zeimaw mi nih mang an simhfiang le, sikhawmsele amahlo leiah pialtirtu cho asi le; thlangamnâk thu an sim mi khawm mangtlâk asi lo. Churuangah mi tla chu dawrâ a tlâu mi hâwi hen an vâi. Ruitu an nei lo ruangah an lawk a sawng.

³ LALPA nih, “Ramdang mi tla nih ka mi tla tlûnah lâi an rêl mi ka thin a run, anmah rêp ding hen ka kal awt. Juda mi chu ka tâ an si. Keimah LALPA Zeizawng tikho nih ka zauhkhenh na awt. Annih tla chu ka râltuknâk rang thiltikho tak an si lai.

⁴ Ka mi tla tlûnah lâirêltu, ruitu ah leh thupêktu ding hen an lakah thawk hen an hawng lai.

⁵ Juda mi tla chu râltuknâk ah nehtu kawrsen tla nih khualâi nêngthû lakah an mêlma tla lamhbêktu hâwi an si lai. LALPA chu an sinah a um ruangah an mêlma rang tlûnah a chuan mi tla khawm an neh na lai.

⁶ “Juda mi tla chu chak tak hen ka siam lai le, Israel mi tla chu ruang ka suah na lai. Anmah ka lungkham na lai le, in leiah ka kîrpi ver nawlh na lai. Ka nawng dah na lo mi hâwi hen an um lai. Kei LALPA an Pathian kasi lai le, an thlachamnâk tla ka sâng na lai.

⁷ Israel mi tla chu kawrsen hâwi hen an chak lai le, uain dintu tla hâwi hen anna lâwm lai. Hi nehnâk hi an thlâk tla khawm nih an theihkumza lai le, LALPA ti mi asi ruangah anna lâwm lai.

⁸ “Ka mi tla chu ka kawh na lai le, munkhat ah ka pumh na lai. Ruang ka suah na lai le, an um ding mi hâwi hen ka pungtir na lai.

⁹ Phundang tla nâwngah ka rek ver na khawmsele, ram lât takah an um khawm ah an hawng ka theihkumza lai. Anmah leh an fa tla thibang chu in leiah munkhat hen an hawng kîr nawlh lai.

¹⁰ Aigupta leh Asiria ram thawk hen an in leiah ka kalpi na lai le; anmah ram nget ah ka umtir nawlh na lai. Gilead ram leh Lebanon khawm ah ka umtir nawlh na lai le, minung chu ram pumpi hen an khat lai.

¹¹ Lawksawngnâk tipi an tan tikah, kei, LALPA nih tî chu ka vuak lai le, Nile tiva thûk tak chu a kang lai. Asiria mizûm tla chu an nâu lai le, Aigupta mi chak tla nih a thiltikhonâk an thlâu lai rawh.

¹² Ka mi tla chu chak tak hen ka siam lai le; keimah an ka sawnh hen ka thu an ngâi lai rawh,” a ti. LALPA nih a sim mi asi.