THUSIMTU 5 - Bawm Common Language Bible Version

Mawhsareh Hen Thutiamnâk Tla Nei Lah

¹ Biakin ah na kal chun a thiamthih rawh. Chunah sîn ding hen va kal chu zapi minung mâwl tak a dik leh diklo khawm theihlotu tla nih bâwlnâk an ap mi ngâk hen a ṭha dauh.

² Thu na sim lânah a ruat tâ rih le, Pathian sinah thutiam ding hen a nam lah. Anih chu vân ah a um le, nang chu tual tlûnah um mi na si, churuang chun na sim ding mi nunlêm ah a leiluat sim lah.

³ Na dî bilik leh mang sia na manh tam lai, thu na sim tam bilik leh na thusim a mâwl dadauh lai.

⁴ Churuangah Pathian sinah thu na tiam chun a rang kho rirî hen a sûm rawh. Mi â chu zei lak khawm ah a mang lo. Ti ding hen thu na tiam mi chu ti rawh.

⁵ Zulhlo pet hen thu tiam ngâk hen chun, thu tiamlo dâidua a ṭha.

⁶ Na thu nih sualnâk ah an ruai lah seh, chu tikah Pathian bâwlpu sinah ka tum mi asi lo ti na simh lai. Zei rangah Pathian thin na thawktir? Na rianṭuan zei rangah na râwktir awt?

⁷ Zeizat tal mang manh khawm le, rian rawtrâi lo zeizat tal ti khawm le, thu zeizat tal sim khawm le a pâwi lo, Pathian chu na ṭih kumza ding asi.

Nungnâk Hi Zeikhawm Asi Lo

⁸ Lâirêlnâk ah mipâm nehsawh hen um mi leh, an diknâk lakah diklo hen an ruat na mi chu na muh tikah chê ti lah. Rianṭuantu kip hi amah tlûnah mi nih a zauhkhenh le, an panih hen sâng dauh a rianṭuantu tla nih an zauhkhenh vevê na.

⁹ Lalchem men fângzûn ding mi lakah â ngauh bâk.

¹⁰ Tangka duhtu na si chun, tâwk ti na nei dah lai lo; neih duh mi na si chun na duh mi zawzawng na tawng ver dah lai loh. Zeikhawm asi lo.

¹¹ Na nei bilik leh na châwm ding mi a tam lai. Na ting mi chu ka nei asi ti theihnâk chu asi.

¹² Rianṭuan mi nih chun ei ding a nei tâwk kho, a nei tâwk lo kho, sikhawmsele a ihmu lam chu a thaw lai. Minei pa chu, zeizat tal nei khawmsele a riaurak lai.

¹³ Hi laikulh ah hin thil ṭihnungkâi ka muh mi a um, mi nih an herh mi tik rangah an tangka an hum le,

¹⁴ vânduainâk zeimawh ruangah an fa le tla rangah roh ding zeikhawm umlo hen an thlâu hep.

¹⁵ Laikulh ah zeikhawm nei lo hen kan hawng lût mi hâwi hen zeikhawm nei lo hen kan suaktâk. Kan rianṭuan ngaih hen zeikhawm kan put kho ding mi a um lo.

¹⁶ A diklo ma? Kan hawng mi hâwitê hen kan kal. Thil tleih ding tum hen kan ṭuan mi lakah zei kan tawng?

¹⁷ Mûi nâwngah ngaihsiat hen, dî hen, thinthawk hen leh damlo hen kan um.

¹⁸ Ka tawng mi chu hi hi asi: Mi âuzawng nih a tikho mi lakah thil ṭha chem chu Pathian nih sâwtlotê a dam karah a rianṭuan tha ni lawh a pêk mi din leh ei leh lâwmnâk chu asi; hi hi minung tingvo chu asi.

¹⁹ Pathian nih minung rangah neihnâk leh thil-le-rî a pêk chun chu lak chun a lâwmtir le, a ṭuan mi lakah a lâwm hen a lâwptlo ding asi. Pathian thilpêk asi.

²⁰ Pathian nih lâwmhnâk a pêk ruangah chun anih khawm nih sâwtlotê dam thu ah a lawksawng tuktarâi lai loh.