THUSIMTU 3 - Bawm Common Language Bible Version

Thil Zeizawng Rangah Tik-Le-Ri

¹ Thil zeizawng laikulh ah a hawng um mi chu Pathian nih tik leh ri a ruat mi hâwi hen a hawng um.

² Suak ni leh thih ni a ruat le, phun tik leh phâwi tik a ruat,

³ thah tik leh damh tik a ruat. Siat tik leh sak tik a ruat.

⁴ Ngaihsiat tik leh lâwm tik a ruat. Lungfâk tik leh lâm tik khawm a ruat.

⁵ Dâwt tik leh dâwt lo tik a ruat, châwchawk tik leh châwchawk lo tik a ruat.

⁶ Tawng tik a ruat, thlâu tik a ruat, hum tik leh lawnh tik a ruat.

⁷ Thlêk tik leh ṭhît tik a ruat, dâisip tik a ruat, hawlh tik a ruat.

⁸ Dâwt tik leh huat tik a ruat, râltuk tik a ruat, rem tik a ruat.

⁹ Kan rianṭuan zawzawng lakah zei dingchangnâk kan nei?

¹⁰ Pathian nih kan tlûnah thilrit a siah mi chu ka theih.

¹¹ Thil zeizawng rangah tik dik tak a ruat. Anih nih chun mâilei thu theih duhnâk hawng kan pêk le, sikhawmsele a thilti tla theihthiam ver hen lâwmnâk hawng kan pêk dahlo.

¹² Churuang chun, kan dam liauah a lâwm ding hen kan ti kho rirî ti ding asi ti ka theih rawh.

¹³ Kan ektê hen kan rianṭuan lakah din leh ei hen kanna lâwm ding asi. Chu chu Pathian thilpêk asi.

¹⁴ Pathian nih thil a ti mi zawng chu a um kumza awt ti ka theih. Chu lakah chun zeikhawm na sap kho lai lo, chu lakah mi zeikhawm na lâk kho lai lo. Pathian nih thil pakhat a ti mi chu amah ṭihtu ding hen hawng kan siam mi chu asi.

¹⁵ Thil a hawng um mi tla mawh a um kho mi tla chu a lânah um rawh mi ver asi. Pathian nih chu thil lîlâ chu a hawng tlungtir nawlh lemang mi asi.

Laikulh Ah Diklonâk

¹⁶ Chu lo khawm ah, hi laikulh a diknâk leh reptak a um ding mi lakah hin sualnâk chu na tawng kho ti ka theih.

¹⁷ Ka thinlungah “Pathian nih mirep leh misual lakah bang cho hen lâi a rêl piak na awt, thil zeizawng leh thilti mi khawm a tik ruat mi lakah a hawng um lai,” ka ti.

¹⁸ Pathian nih ramsa ngâk hen kan ṭha dauh lêm lo zia hawng kan theihtir ding duh ruangah hawng kan nik mi asi ti ka ruat.

¹⁹ Chubang nûnah chun minung leh ramsa chu bang cho hen thi ding mi an si. Pakhat a thi mi hâwi hen a dang khawm a thi lai. An panih hen thilsiam bang cho an si vevê. Minung hi ramsa ngâk hen an ṭha dauh lêm lo, nungnâk lakah anna dang lo ruangah.

²⁰ Valeidip ah bang cho hen anna chang vevê awt. Chu valei thawk hen suak mi an si vevê le; chu valei lîlâ ah anna chang vevê lai.

²¹ Minung thlarau chu vân leiah a kal, ramsa thlarau chu tual leiah a ṭum, ti âunih a theih kho?

²² Churuangah kan ti ding ṭha chem chu rian kan ṭuan mi lakah kanna lâwm ding asi ti ka theih. Thil dang zeikhawm kan ti kho mi a um lo. Kan thih nûnah lam chun thil a hawng tlung ding mi theih khonâk kan rangah lampi a um lo.