THUSIMTU 2 - Bawm Common Language Bible Version

¹ Mah a lawmhtir ding ka tum le, lâwptlonâk chu zei asi ti ka tawng rawh. Sikhawmsele chu khawm chu zeikhawm asi ber lo ti ka theih.

² Nih khawm hi mi âtkâi tak asi, nuamchênnâk khawm nih an ṭhattir lo ti ka theih.

³ Fing ding hen ka duhnâk nih hawng ka put le, uain hen mah a lawmhtir ka tum le, tik ṭha ka nei. Chu chu minung nih tual ah hun sâwtlotê an dam karah a ṭha chem siding ka ruat.

⁴ Thil rokual tak tla ka lîm rawh. Keimah ngelchel nih in tla ka sak le, grep tla ka chîng.

⁵ Dûm tla ka siam le, thingthei ka chîng, a sungah thingthei zât tinpirit rah nei mi tla ka chîng le;

⁶ luangtir ding hen tî dil tla ka chawh.

⁷ Sal tam tak ka châwk le, ka insungkhur ah sal suak mi tam tak an um. A lânah Jerusalem ah um mi tla ngâk khawm ran vulh mi ka nei dauh.

⁸ Ka lâirêlnâk ram ah lal tangka siahnâk in ah tlûn rêt hen tangka leh ngûn ka pawng asi. Nunau leh mipa tla nih hawng ka lâwmtir ding hen la an sak le, mipa duh kâng nunau tam tak ka nei.

⁹ Asi, ka rokual, Jerusalem ah um mi tla ngâk hen ka rokual dauh le, ka finghnâk khawm nih a ka tlawlhtir dahlo.

¹⁰ Zei thil tal ka duh mi chu ka nei; Nuamnâk zeikhawm ka dawktir lo. Rian ka ṭuan mi kip ah ka zûm le, chubang zawzawng chu ka lâwmman asi.

¹¹ Hamh tak hen thil ka ti mi zawzawng ka ruat chiam le, zeikhawm a ṭhatnâk a um lo ti ka theih. Zeikhawm chawhchân lo mi thli ṭhâwl mi hâwi cho asi.

¹² Churawhchun, a lânah lalchem nih an ti mi cho lalchem nih a ti kho. Churawhchun, fing ding mawh zeikhawm siarlo ding hen mawh mâwl tak um ding dân ka dawn.

¹³ Asi, “finghnâk chu âtnâk ngâk hen a ṭha dauh, chêu chu mûi ngâk hen a ṭha dauh hâwi hen.

¹⁴ Mifing tla nih an kalnâk ding an muh kho, mi â tla nih chun an muh kho lo,” ti ka theih. Sikhawmsele chu vânduainâk nih chun kan ektê hen bang khap hen hawng kan ngâk.

¹⁵ Ka thinlung ah, “Mi â, a vânduai mi hâwi hen kei khawm nih ka tuar awt. Churuangah chu hâwi tluk finghnâk ruangah zei me ka dingchangnâk a um,” ka ti. “Zeikhawm asi lo,” “Zei thil khawm asi lo,” ka ti.

¹⁶ Âukhawm nih mifing khawm mi â khawm an theihkumza lo. Hi nûnthâi mâilei ah chun philh kan si hep lai. Mifing hen mi â hen bang cho kan thi lai.

¹⁷ Churuangah nung hi ka rang chun zeikhawm asi lo, thil ka lakah a hawng tlung mi zawng chu zeikhawm asi lo, lawksawngnâk hep asi ruangah. A ektê hen zeikhawm asi lo le; thli ṭhâwl mi kasi ko.

¹⁸ Rian ka ṭuan mi hi ka rangah zeikhawm a ṭhatvaknâk a um lo, ka mun luahtu rangah mâk ding mi asi ti ka theih ruangah;

¹⁹ mifing asi ding mi leh mi â asi ding mi âunih theih? Khawmsele thil zeizawng ka ṭuan mi leh ka finghnâk hen laikulh ah ka tawng mi tla chu â ting lai. A ektê hen zeikhawm asi lo.

²⁰ Churuangah ka rianṭuan hamhnâk lakah ka sîr rawh.

²¹ Na finghnâk, na theihnâk, na thiamnâk zawzawng hen rian na ṭuan mi chu ṭuan lotu âu rangah mawh na mâk hep ding mi asi. Zeikhawm asi lo, asi taktê lo ma?

²² Na dam karah dî tak hen rian na ṭuan le, chu lakah zei me na langh awt?

²³ Na dam kar zawng ah thil zeizawng na ti mi nih thil zeikhawm a suah lo, dîtnâk leh thinlung fâknâk cho asi. Zân ah khawm na thinlung â dîn kho lo. A ektê hen zeikhawm asi lo.

²⁴ Mi nih thil a ti kho mi lakah thil ṭha chem chu a rianṭuan tha ni lawh a ei a din hen â lâwm mi chu asi. Chubang tla khawm Pathian sin thawk hen mi asi ti ka theih.

²⁵ Din leh ei silo hen a nan lawmhtir khotu thildang zei a um rih?

²⁶ Pathian nih amah lawmhtirtu tla chu finghnâk leh lâwmnâk leh theihnâk a pêk, sikhawmsele misual tla lam chu rian a ṭuantir na, a hâwltir na, a khawng tir na, an tawng mi tla chu amah lawmhtirtu tla rangah pêk ding hen. Zeikhawm an si lo, thli ṭhâwl mi hâwi asi.