THUSIMTU 12 - Bawm Common Language Bible Version

¹ Churuangah seino na si liauah a nan Siamtu theihkumza le, na ngaihsiat ni leh kum a hawng tlung hen “Nungnâk lakah ka lâwm loh” na ti ni a tlung lânah.

² Chu chu nî leh thlâ chêu leh ârfi tla a mûi hen vândâwm tla a len lo rawh ding mi tik tla chu asi.

³ Churawhchun, a nan vêngtu na bân tla a thir lai le, na kê tuah a chak mi a zê lai. Râwl na khâinâk na hâ tla a tâwm lai le, fiang tak hen na muhnâk mit khawm a mûi lai.

⁴ Khualâi tlâng mi hâu tla theihlo ding hen na nâ khawm a sêt lai. Khual hâu leh tumphung an tum mi hâu khawm fiang lo tak hen na theih lai, sikhawmsele va awnh hâu nih na it mi a nan ṭhangh lai.

⁵ Mun sâng tak ah um tla na ṭih lai le, kal khawm na rangah ṭihnungkâi asi lai. Na sam tla a pâr lai le; nangmah men zângrah hen na hersân kho lai le, duhnâk zawzawng a vei hep lai rawh. A dawnghnâk ah dinhnâk mun ah kan kal lai rawh le, khualâi dungah mithi ulhnâk a um lai.

⁶ Tangka chikchîn tla a chat lai le, ngûn meichêu khawm a tlû hen a kiak lai; tikhurchawh lakah mi rirual tla a chat lai le, tibêl tla a kuai lai.

⁷ Kan taksa tla chu tual mi valei ah â chang lai le, kan nungnâk thaw tla chu hawng kan pêktu Pathian sinah a kîr lai.

⁸ Mifing nih chun, zeikhawm asi lo, zeikhawm asi lo. Thil zeizawng hi zeikhawm asi lo, a ti.

Thu Tlângpi

⁹ Sikhawmsele mifing chu a fing ruangah, a theih mi tla chu mi tla a simh kumza na. Finghnâk â sîn le, zumhkâi tak hen a diknâk tla a nik.

¹⁰ Mifing nih thlangamnâk thu tawng ding a tum le, sikhawmsele thu a rîn mi tla chu zumh a kâi asi.

¹¹ Mifing thusim chu fung zum dawrâpu nih a dawrâ an khalhnâk hâwi asi le, thufing a pumh mi chu thîrling khenh mi hâwi hen a bir hen a tlo. Kan ektê rangah Dawrâpu pakhat Pathian nih a pêk na mi asi.

¹² Ka fapa, thil dang theih ding mi a um rih. Lasuibu lakah rîn hen a dawng awtlo le, na rêl tam tuk khawm ah na dî lai.

¹³ Hi bang tla nûnah hin, thil pakhat cho sim ding a um: Pathian ṭih rawh, a thupêk zûl, hi bang tla zawng hi minung a siam na mi tla rang ding asi ruangah.

¹⁴ Pathian nih thil kan ti mi zawng ah lâi a rêl awt le, a sia mi khawm a ṭha mi khawm, a thup hen thil ti mi tla khawm.