SAM 96 - Bawm Common Language Bible Version

Pathian Lalchem Lâirêltu Lal Chu

¹ LALPA sinah la thar sak u! Laikulh zawzawng nih LALPA sinah la sak u!

² LALPA sinah la sak ule, amah chu sawr u! Ruang hawng kan suah mi thâwngthâng ṭha chu nisiar hen phuang u.

³ Mi zawzawng sinah a chaknâk thilti chu phun tla sinah a rokual zia phuang u.

⁴ LALPA chu a rokual le, sâng tak hen chawnglawmh ding asi; Pathian dang zawzawng ngâk hen zah ding asi.

⁵ Phundang zawzawng tla pathian chu ruk cho asi, LALPA lam nih chun vân a siam.

⁶ Lalnâk leh rokualnâk nih a kulh; Thiltikhonâk leh dawhnâk hen a Biakin a khattir.

⁷ Tual tlûn mi zawzawng tla, LALPA chu sawr u; A rokual zia leh a chaknâk sawr u.

⁸ LALPA min rokual chu sawr ule, thilpêk tla put hen a Biakin ah hawng u.

⁹ Mi Thenhlimh a hawng lang liauah a mâika ah kûn ule; tual tlûn mi zawzawng a mâika ah thir u!

¹⁰ “LALPA chu lalchem asi!” ti phun zawzawng sinah sim u. “Tual chu a mun ah bir tak hen a siah le, changh kho ding asi lo; zapi tla chu dik tak hen lâi a rêl piak lai,” ti hen.

¹¹ Tual leh vân a lâwm u! Tisumsumriat leh a sungah thilsiam tla nan hâu suah u;

¹² phâi tla leh a sungah um mi tla, a lâwm u! Tumun ah thing tla lâwm hen an âu lai,

¹³ lâirêl ding hen LALPA a hawng tik chun laikulh mi chu dik tak leh ṭha tak hen lâi a rêl piak na lai.