SAM 94 - Bawm Common Language Bible Version

Pathian Mi Zawzawng Lâirêltu Chu

¹ LALPA, nang Pathian mi rêptu chu na si, na thinthawknâk hawng langh!

² Mi zawzawng lâirêltu na si; thawk le, mi zûm tla chu anmah dêng vima hen pêk na!

³ LALPA, zei tluk leh zeitiang riamruam me misual chu â lâwm awt?

⁴ Zeitiang riamruam me an dân buar ruangah anna zûm hen an dân râwk ruangah anna khâwng awt?

⁵ LALPA, na mi tla an râwk le, na tâ tla chu an nehsawh.

⁶ Numei tla leh ngâkṭah tla an thah na, kan ram mi khual tla chu an thah na.

⁷ “LALPA nih hawng kan muh vak lo, Israel Pathian nih a theihtir lo,” an ti.

⁸ Ka mi tla, chu hâwi tluk hen nan mâwl kho zia? Zei tikah nan theihthiam awt?

⁹ Pathian kan nâ tla siamtu nih a theih kho awtlo ma? Kan mit siamtu nih a muh kho awtlo ma?

¹⁰ Phun zawzawng lakah thuneitu nih a rêp na awtlo ma? Mi zawzawng sîntirtu nih finghnâk a nei awtlo ma?

¹¹ LALPA nih an thinlung dawn chu a theih, an thilruat tla chu zeikhawm asi lo ti a theih.

¹² LALPA, na sîntir na mi chu an thaw a suak hen na dân na sîntir mi chu an thaw a suak!

¹³ Misual tla chu an lawksawng ni thawk hen, khur chawh lakah na tângtir na tiang hen anih chu na dîntir.

¹⁴ LALPA nih a mi tla chu a kaltâk na lai lo le; amah lakah um mi tla chu a karo hen a siah na lai lo.

¹⁵ Lâirêlnâk ah chun lâirêl diknâk a lang nawlh lai, mirep tla zawzawng nih anna âwi lai.

¹⁶ Ka rangah misual tla do ding hen âu me thawk lai? Thilsual titu tla do ding hen ka sîrah âu a um lai?

¹⁷ LALPA nih hawng ka ṭangpi lah sele chu, ram kingnâk ah ka kal ving lai rawh.

¹⁸ “Ka tlû rawh” ka ti le, sikhawmsele, LALPA, na dâwtnâk dawnglo hen hawng ka ṭangpi.

¹⁹ Ningdawng leh dî tak hen ka um liau khawm ah, Thla na ka ngamh le, na ka lawmhtir.

²⁰ Lâirêlnâk diklo lakah na kawpkaih lo, dân diklo siamtu hen khawm.

²¹ Mi ṭha phiartu leh sual nei lo thahtu hen khawm na rem lo.

²² Sikhawmsele, LALPA nih a ka vêng le, ka Pathian nih a ka hum.

²³ An sual ruangah a rêp na lai le, an sual ruangah a veih na lai le, LALPA kan Pathian nih a veih na lai.