SAM 92 - Bawm Common Language Bible Version

Sawrnâk La

¹ LALPA, na sinah lâwmthusim leh Chungnungchem Pathian nangmah chawnglawmhnâk la sak chu a ṭha a!

² Zîng siar hen nangmah dâwtnâk dawnglo leh zân siar hen na zumhkâinâk tla chu

³ tumphung ri tam tak leh ṭingṭang hâu dawh tak hen phuang chu thungâi a ṭha.

⁴ LALPA, na thilti rokual nih hawng ka lawmhtir le; thil na ti mi ruangah lâwm hen la ka sak.

⁵ LALPA! na thilti chu a rokual hen, na thinlung dawn chu a thûk a!

⁶ Hi hi mi â tla nih an theih kho lo mi leh mi mâwl tla nih an theihthiam lo mi thil chu asi.

⁷ Misual tla chu belh hâwi hen an ṭhang hen, thil diklo titu tla chu an sul-le-lam tluang hen an um kho; khawmsele, an ektê hen râwk dep hen an um lai.

⁸ LALPA, nang chu zungzâl rangah lâirêltu sâng tak na si kumza ruangah.

⁹ Na mêlma tla an thi ding mi leh misual tla neh hen an um ding mi chu kan theih.

¹⁰ Mâng ah mi fung chak tak hâwi hen na ka siam le, lâwptlonâk hen mal na ka sâwm.

¹¹ Ka mêlma tla neh hen an um mi chu ka muh le, misual tla ṭap hâu chu ka theih.

¹² Mirep chu tûm kûng hâwi hen a ṭhang lai le; Lebanon ah mi sidar thing hâwi hen a ṭhang lai.

¹³ LALPA in ah thing phun mi hâwi mi Pathian Biakin ah châwm mi hâwi an si,

¹⁴ tar tiang hen rah suah mi leh ring dal hen bir kumza mi an si.

¹⁵ Hi nih hin hawng kan kilkâwitu nih chun diklonâk a nei lo mi leh LALPA chu mirep asi ti a langhtir.