SAM 91 - Bawm Common Language Bible Version

Pathian Hawng Kan Kilkâwitu

¹ Him ding hen LALPA sinah kaltu leh zeizawng tikho Zauhkhenhnâk tangah umtu tla nih chun

² a sinah, “Nang chu hawng ka vêngtu leh hawng ka kilkâwitu na si; ka Pathian na si, nangmah lakah ka ngauh,” a ti kho.

³ Theihlo mi ṭihnungkâi zawzawng leh thihnâk râi zawzawng lakah mi him tak hen a nan kil lai.

⁴ A thlâ hen a nan tuam lai le; amah vêngnâk ah chun him tak hen na um lai; zumh a kâinâk hen an vêng hen an zauhkhenh lai.

⁵ Zân ah zei ṭihnungkâi tal khawm siseh, sûn ah mawhsareh hen donâk a tlung khup khawmsele;

⁶ mûi lakah râi hawng tlung khawmsele, sûn ah sualnâk nih thah khawmsele, na ṭih ding asi lo.

⁷ Na sîrah an thi mi sâng khat tlû na khawmsele, sâng râ na kiangkam ah tlû na khawmsele, nang lam chu nganfâk na tawng lai lo.

⁸ Zei hâwi hen misual chu rêp an si, na zauh chun na muh lai.

⁹ Nangmah vêngtu ding ah LALPA chu na siam le, Chungnungchem chu nangmah kilkâwitu ah na siam le,

¹⁰ churuang chun vânduainâk rerêng na lakah a tlung lai lo le, donâk rerêng na in kiangkam ah a hawng lai lo.

¹¹ Pathian nih a vânmifial tla chu nangmah ruangrûl ah thu a pêk lai, na kalnâk zawng ah a nan zauhkhenh ding hen thu a pêk lai.

¹² Lung nih na kê nganfâk a pêk ding mi lakah an vêng ding hen an kut hen an dawmh lai.

¹³ Chakeibaknei tla leh rûl tla chu na chîl lai le, chakeibaknei râng leh rûl tûrnei tla chu.

¹⁴ Pathian nih chun, “Hawng ka dâwttu chu ka hum lai le, LALPA kasi ti hawng ka theihtu tla chu ka vêng na lai.

¹⁵ An hawng ka auh tikah ka sâng na lai le; an lawksawng tikah an sinah ka um lai. Ruang ka suah na lai le, thangṭhatnâk ka pêk na lai.

¹⁶ San sâunâk ka pêk na lai le, ka hum na lai,” a ti.