SAM 9 - Bawm Common Language Bible Version

A Lâirêl Dik Ruangah Pathian Sinah Lâwmthusimnâk

¹ LALPA, ka thinlung zawzawng hen ka nan sawr lai le, thilchê na ti mi zawzawng tla chu ka sim lai.

² Nangmah ruangah lâwm hen la ka sak lai. Thil zeizawng tikho Pathian na sinah sawrnâk la ka hawng sak lai.

³ Na hawng lang chun ka mêlma tla an kîr le; an tlû hen an thi.

⁴ Na lâirêlnâk lakah chun na dik hen na ṭha le, keimah sunhsak hen lâi na rêl.

⁵ Lunglo tla chu na mawhtir le, misual tla chu na veih le, theih an si lai lo rawh.

⁶ Kan mêlma tla chu zungzâl hen an dih rawh! An khuapi tla chu na râwk le, chun philh dep an si rawh.

⁷ Sikhawmsele, LALPA chu zungzâl Lalchem asi; lâirêl ding hen a laltophah chu a toh.

⁸ Repnâk hen laikulh chu lâi a rêl le; diknâk hen phun tla lâi a rêl.

⁹ Nehsawh tuar mi rangah LALPA chu himnâk asi le, nawk liauah himnâk mun asi.

¹⁰ LALPA, a nan theihtu nih chun a nan zumh lai; na sinah hawngtu tla chu âukhawm na nar loh.

¹¹ Zion ah lâirêltu LALPA chu sawr hen la sak u! A thilti tla chu phun kip sinah sim u!

¹² Tuartu tla chu Pathian nih a theih; an âu hâu chu a philh lo le, chun, thil diklo titu tla chu a rêp na.

¹³ LALPA, ka lakah khuaruat rawh! Ka mêlma tla nih nganfâk an ka pêk mi hi zauh le! Thihnâk lakah mi hawng ka suah rawh LALPA,

¹⁴ Jerusalem mi zapi mâika ah ka dîr khonâk ding hen, leh ka nan sawrnâk san zawzawng tla ka simh na ding hen ruang na ka suah ruangah ka lâwm lai.

¹⁵ Lunglotu tla nih khur an chawh le, a sungah an tlâ; anmah thang nih a awh na.

¹⁶ LALPA amah ngelchel chu a lâirêl repnâk nih a langhtir le, misual tla chu anmah thilti nih a awh na.

¹⁷ Thihnâk hi misual zawzawng leh Pathian duhlotu zawzawng dawnghnâk asi.

¹⁸ Mi ṭangpi ngâi chu thlawrhthlâu hen an um kumza lai loh, mipâm tla lungumnâk chu zungzâl hen a vei lai loh.

¹⁹ LALPA, hawng le! Mi tla nih nangmah an siarlo lah seh! Lunglo tla chu na mâika ah siah na hen an lâirêlnâk phuang.

²⁰ LALPA, lauh na le, thi kho mi minung an si ti theihtir na.