SAM 89 - Bawm Common Language Bible Version

Phun Lawksawng Liau Mi La

¹ LALPA, na dâwtnâk dawnglo la chu ka sak kumza lai le, zumh na kâinâk thu chu ka phuang kumza lai.

² Na dâwtnâk chu zeiliau zawng ah a um kumza lai ti ka theih, na zumhkâinâk khawm vân hâwi hen a um kumza lai.

³ Nangnih chun, “Minung ka thîm mi hen thutiamnâk ka siam; ka to-aw David sin khawm thu ka tiam,

⁴ ‘Na thlâk chu lal asi kumza lai le; na lal chi khawm ka zuah kumza lai,” na ti.

⁵ LALPA thilchê na ti mi chu vân nih la hen an sak le; zumh na kâinâk la hen an sak.

⁶ LALPA, nang hâwi vân ah âukhawm an um lo; vân minung tla lak khawm ah nang tluk âukhawm an um lo.

⁷ Mi thenhlimh lâirêlnâk ah chun zah na kâi le; nangmah zah hen an ektê hen an dîr.

⁸ LALPA Pathian, Zeizawng tikho, nang hâwi âukhawm mi chak an um lo; LALPA, thil zawzawngah zumh na kâi.

⁹ Tipi thiltikho tak tlûnah lâi na rêl le; a tlingtlawknâk chu na rehtir.

¹⁰ Rahab mi ṭhalo chu na râwk le, na thah; na thilti chaknâk hen na mêlma tla chu na neh na.

¹¹ Vân chu na tâ asi, tual khawm; laikulh leh a sungah thil zawzawng chu na siam na.

¹² Sim leh mar na siam; Tabor Tlâng leh Hermon Tlâng chu na sinah lâwm hen la an sak.

¹³ Na chak chiam a! Na chaknâk chu a rokual a!

¹⁴ Na lalram chu na repnâk leh na lâirêl diknâk ah a lang; na ti mi zawzawng lakah dâwtnâk leh zumhkâinâk a lang.

¹⁵ Nangmah vêlneihnâk chêu ah umtu tla leh la hen a nan sawnhtu tla chu an lâwptlo a!

¹⁶ Nangmah ruangah nî tlâk hen anna lâwm le, na ṭhatnâk ruangah a nan sawr.

¹⁷ Nehnâk rokual tak na kan pêk le; na dâwtnâk ruangah nehtu ah na hawng kan siam.

¹⁸ LALPA, nangmah nih hawng kan kilkâwitu na thîm; nangmah, Israel Pathian Thenhlimh nih kan lal na kan pêk.

David Sinah Pathian Thutiam

¹⁹ A lânah hun sâwt tak langhnâk ah na to-aw zumhkâi tla sinah thu na sim le, “Kawrsen minthang tak ka ṭangpi; zapi lakah mi pakhat ka thîm mi sinah laltophah ka pêk.

²⁰ Sariak thenhlimh thuh hen ka to-aw David chu lal ah ka siam.

²¹ Ka chaknâk chu a sinah a um kumza lai le, ka thiltikhonâk hen amah chu ka chaktir lai.

²² A mêlma nih an neh dah lai loh, misual nih khawm an neh lai loh.

²³ A mêlma chu ka veih lai le, amah huatu tla chu ka thah lai.

²⁴ Ka dâwt lai le, a sinah zumhkâi hen ka um lai; nehtu ka sitir kumza lai.

²⁵ A ram chu Mediteranian thawk hen Eufretis tiva tiang hen ka kauh lai.

²⁶ ‘Nang chu ka Pathian leh ka pa na si, hawng ka vêngtu leh ka ruangsuahtu na si,’ a ka ti lai.

²⁷ Ka fapa tîr ah leh lal zawzawngah a lianchem ah ka nan siah lai.

²⁸ A sinah thu ka pêk mi chu ka kil kumza lai le, a sinah thu ka tiamh mi khawm a um kumza lai.

²⁹ Vân hâwi hen a lal chi chu a um kumza lai; a thlâk tla khawm lal an si kumza lai.

³⁰ “Sikhawmsele, a thlâk tla nih ka dân an zûl lo hen, thu ka pêk na mi hâwi hen an um lo chun,

³¹ ka sîntir na nâk an sunhsak lo hen ka thupêk tla an kil lo chun,

³² an sual ruangah ka rêp na lai le; an thilti diklo ruangah tuarnâk ka pêk na lai.

³³ Sikhawmsele, David ka dâwt mi chu ka bâng lai lo le, a sinah thu ka tiam mi chu ka lêt lai loh.

³⁴ A sinah thudân ka tuk mi chu ka siat lai lo le, a sinah thu ka pêk mi pakhattê men ka veih lai loh.

³⁵ “Zeiliau zawng ah ka min thenhlimh hen thu ka tiamh le; David sinah âwkrâwl ka sim dah lai lo.

³⁶ Thlâk tla a nei kumza lai, chun, nî a chêu kar zawzawng chu a ram ka vêng piak lai.

³⁷ Vân ah theihpitu zumhkâi chu thlâ a um kumza mi hâwi hen a um kumza lai,” ti hen.

Lal Nehnâk Lakah Ulhnâk

³⁸ Sikhawmsele, na lal thîm tlûnah chun na thinrun le; nangnih na thlawrhthlâu le, na nawng rawh.

³⁹ Na to-aw sinah na thutiam chu na râwk le, a lallukhuh chu nêng lakah na lawnh rawh.

⁴⁰ A khuapi kulh chu na râwk le, a kulhpi chu râwk dep hen na siah.

⁴¹ A kiangah kaltu tla nih a neih an fîr piak le, a inpa tla nih an nihsanh.

⁴² A mêlma tla rangah nehtu sinâk na pêk le, lâwptlo tak hen na umtir na.

⁴³ A râlthuam tla chu mang tlâk lo hen na siam le, tuknâk ah chun neh hen na umtir.

⁴⁴ A lal ṭhianṭhunh chu na lâk piak ving le, a laltophah chu tual ah na lawnh piak.

⁴⁵ A san zawhlo hen na siam le, ningzak leh mualpho hen na siam.

Suak Ding Hen Thlachamnâk

⁴⁶ LALPA, na thup kumza awt mazei? Zei chan riamruam me na thinthawknâk chu mei hâwi hen a kâng awt?

⁴⁷ Ka san tâwi zia hi theihkumza le; thi kho hen na kan siam mi hi theihkumza!

⁴⁸ Âu me thi lo hen dam kumza kho? Zei minung me thlân ah kallo ding hen â vêng kho?

⁴⁹ LALPA, na dâwtnâk theihfiangnâk masa zeiah? David sinah thu na tiamh mi chu zeiah?

⁵⁰ Kei na to-aw zauhnawmh hen ka um mi philh lah le, lunglo tla nih siatbarh kumza hen ka um mi hi philh lah.

⁵¹ LALPA! na mêlma tla nih na lal thîm an zauhnawmh, a kalnâk kip ah an zauhnawmh.

⁵² LALPA chu sawr kumza rawh! Amen! Amen!