SAM 88 - Bawm Common Language Bible Version

Ṭangpi Ding hen Âunâk

¹ LALPA Pathian, ka ruangsuahtu, nî tlâk hen ka âu le, zân ah na mâika ah ka hawng.

² Ka thlachamnâk hi theih le, ṭangpi ngiar hen ka âu mi hi ngâi rawh!

³ Lawksawngnâk tam tak ka lakah a hawng tlung le, thihnâk ka naih dâwp.

⁴ Midang thi ding mi hâwi kasi; ka chaknâk zawzawng a dih hep,

⁵ Mithi nâwngah mâk hen ka um, thlân ah thah mi ruak hâwi kasi, na philh dep leh na ṭangpi kho lo rawh mi hâwi hen.

⁶ Thlân tawdeng leh a mûi chem leh khur thûk chem ah na ka lawnh.

⁷ Na thinthawknâk rit tak chu ka tlûnah a um le, A zualkâinâk tangah râwk dep hen ka um rawh.

⁸ Ka hâwi le tla nawng leh duh lo hen na ka siam, khârkhumh hen ka suak kho lo;

⁹ Ka mit tla tuarnâk ruangah a zê. LALPA, nisiar hen ka nan auh le, thlacham hen nangmah leiah ka kut ka hawng phar.

¹⁰ Mithi rangah chun thilchê na ti mazei? Annih tla chu thawk hen a nan sawr mazei?

¹¹ Thlân ah na dâwtnâk dawnglo thu sim asi mazei? Zumh na kâinâk thu râwknâk mun ah sim asi mazei?

¹² Na thilchê ti mûi nâwngah muh asi mazei? Philh rawh mi ram ah na ṭhatnâk khawm theih asi mazei?

¹³ LALPA, ṭangpi ka nan ngiar; zîng siar hen na sinah thla ka cham.

¹⁴ LALPA, zei rangah na ka nawng? Zei rangah na ka hertâk?

¹⁵ Ka ngâksia liau thawk hen thi dedêng hen ka tuar le; na ka rêpnâk rit tak ruangah ka uai tlek.

¹⁶ Na thinthawknâk fâk tak nih hawng ka râwk dep, na ka donâk ṭihnungkâi nih a ka râwk dep.

¹⁷ Nî tlâk hen tîlian hâwi hen an ka kulh le; ka kiangkam zawzawngah nâi tek hen an um.

¹⁸ Ka hâwi le nih kaltâk hen king tak hen na ka siam; mûi tla chu ka hâwi le an si.