SAM 85 - Bawm Common Language Bible Version

Phun Tla Ṭhatnâk Ding Hen Thlachamnâk

¹ LALPA, na ram rangah chun khua na ruat le, Israel tla sul-le-lam chu na tluangtir nawlh.

² Na mi tla sual chu na ngaihdam piak na le; an thilsual ti zawzawng chu na ngaihdam piak na.

³ An lakah na thinthawknâk chu na lêt le; na thinrunhnâk fâk tak chu na nâwp.

⁴ Pathian kan ruangsuahtu, hawng kan kîrtir nawlh le, kan lakah na lungsilonâk chu bângtir!

⁵ Kan lakah na thinthawk kumza awt mazei? Na thinthawknâk chu a bâng awtlo ma?

⁶ Hawng kan chaktir nawlh le, kannih na mi tla nih hin kan sawr lai.

⁷ LALPA, na dâwtnâk dawnglo hawng kan muhtir, ruangsuah ding hen na ṭangpinâk hawng kan pêk.

⁸ LALPA Pathian nih a sim mi chu ka ngâi le; kan âtnâk lampi leiah kan kîr nawlh lo asi chun a mi le tla sinah thlangamnâk hawng kan tiamh.

⁹ Amah zahtu tla chu hum ding hen â tîm kumza, kan ram ah hin ruangsuah ding hen hawng kan umpi kumza lai.

¹⁰ Dâwtnâk leh zumhkâinâk anna tawng lai; repnâk leh thlangamnâk anna tlâi.

¹¹ Minung diknâk nih vân a phanh lai le, Pathian repnâk nih vân thawk hen a bih lai.

¹² LALPA nih kan sul-le-lam a tluangtir lai le, kan ram nih neihnâk a suah lai.

¹³ Diknâk chu LALPA mâika ah a kal lai le, a rangah lampi a siam lai.