SAM 84 - Bawm Common Language Bible VersionPathian In Ngâinâk 1 Zeizawng tikho Pathian, na Biakin ka ngâi a! 2 Chunah um chu ka duh a! LALPA Biakin ah um ka ngâi. Pathian nung sinah ka pumpiluk hen la ka sak. 3 Kâwlrît nih bû a khuar hâwi leh pêlêp khawm nih mah in an nei. na mâichâm kiangah an fa tla an khurhâwm na asi. LALPA zeizawng tikho, ka lal leh ka Pathian. 4 Na Biakin ah um mi tla chu anna lâwm a! Nangmah sawr hen la an sak kumza. 5 Nangmah thawk hen chaknâk tawngtu tla chu an thaw a suak a! Zion Tlângah tlawng ding duhtu tla chu an thaw a suak. 6 Baka kuam an kal liauah tinungva umnâk asi; ruah tîr tla nih tili tla an khah. 7 An kal liau chun an chak dadauh le, Pathian tla Pathian chu Zion ah an muh lai. 8 LALPA Pathian, Zeizawng tikho, ka thlachamnâk theih rawh. Jakob Pathian! ngâi rawh. 9 Pathian, na thîm mi kan lal chu malsâwm rawh. 10 Na Biakin ah ni khat mang hi mun dangah ni sângkhat mang ngâk hen a ṭha dauh. Mi ṭhalo in ah um ngâk hen ka Pathian in kawtkâ ah ka dîr dauh lai. 11 LALPA chu hawng kan vêngtu leh lal rokual asi, zahnâk leh vêlneihnâk hen mal hawng kan sâwm. Thil dik titu tla rangah zeikhawm thil ṭha sianglo a nei lo. 12 Zeizawng tikho Pathian, nangmah an ngauhsantu tla chu anna lâwm ngâk a! |
Bawm Common Language Bible © Bangladesh Bible Society, 2004. All rights reserved.
Bangladesh Bible Society