SAM 83 - Bawm Common Language Bible Version

Israel Mêlma Tla Rangah Nehnâk Ding Hen Thlachamnâk

¹ Pathian, hawlh lo hen um lah; châng lo hen um lah, dâisip lah!

² Zauhnik! na mêlma tla an thawk le, a nan huatu tla an hel.

³ Na mi le tla tlûnah thil thup ti an tum le; na kilkâwi na mi chu phiar an tum na.

⁴ “Hawng u, an phun tla hi kan veih dep na lai le, Israel chu kumleza hen theih asi lai lo rawh,” an ti.

⁵ Nangmah do ding hen murui an siam!

⁶ Chubang tla chu Edom, Ismael tla; Moab leh Hagrit,

⁷ Gebal, Amon, Amalek, Philistia leh Tura tla an si.

⁸ Lot thlâk tla Amon leh Moab rangah Asiria khawm nih murui chak tak siding hen a bawp na.

⁹ Kison Va ah Midian mi tla Sisera leh Jabin tlûnah na ti hâwitê hen ti na.

¹⁰ Endor ah na neh na le, an ruak tla tual ah a thû hep.

¹¹ An ruitu le tla chu Orep leh Zeep tlûnah na ti mi hâwi hen ti na; Zebah leh Zalmuna lakah na ti hâwi hen an lâirêltu tla chu neh na.

¹² “Pathian tâ chu kanmah tâ siding hen kan lâk lai,” titu tla chu.

¹³ Pathian, valeidip hâwi hen zuangtir phin na le, fapawn thli nih a ranh phin mi hâwi hen.

¹⁴ Thingmun a kâng mi hâwi leh tlâng mei nih a khangh mi hâwi hen,

¹⁵ na thlipi hen nunsimh na le, na thli ṭihnungkâi hen lauh na.

¹⁶ LALPA, an mêl chu ningzak hen khattir le, na thiltikhonâk chu theihtir nawlh na.

¹⁷ Neh leh lâu hen um na sele; ningzakkâi tak hen thi na seh.

¹⁸ Nangmah cho chu LALPA leh tual ah lâirêltu lian na si ti an theihnâk ding hen.