SAM 80 - Bawm Common Language Bible Version

Phun Tla Remhnawlhnâk Ding Hen Thlachamnâk

¹ Israel Dawrâ vêngtu, hawng kan ngâi, nangmah ranrual vêngtu, hawng kan theih rawh. Thilnung tla thla tlûnlei ah na laltophah tlûnah to le,

² Efraim, Benjamin, Manaseh, phun tla lakah nangmah ngelchel a langh. Na chaknâk hawng kan muhtir le; hawng le, hawng kan hum!

³ Pathian! Hawng kan kîrtir nawlh! Na khuaruatnâk hawng kan muhtir le, ruangsuah hen kan um lai.

⁴ LALPA Pathian, zeizawng tikho, zeitiang riamruam me na mi tla thlachamnâk ah hin na thin a run awt?

⁵ Ngaihsiatnâk ei ding na kan pêk le, mitthli hâi lian tak din ding na kan pêk.

⁶ Kan kiangkam mi phun tla chu kan ram dotu ding ah na siam le; kan mêlma tla nih chun hawng kan zauhnawmh rawh.

⁷ Pathian, Zeizawng tikho! Hawng kan kîrtir nawlh le, na khuaruatnâk hawng kan muhtir le, ruangsuak hen kan um lai!

⁸ Aigupta thawk hen grep zûn na suah le, Phundang tla chu na nar na le,

⁹ an ram ah na phun kho ding hen mun na sâm le, a ram chu thûk tak hen a lût le, ram pumpi ah a zâm.

¹⁰ A dâidul nih tlâng tla a dulh na, sidar thing lian tla chu a ṭeng tla nih a dawrh.

¹¹ A ṭeng tla chu Mediteranian tipi leh Eufretis Tiva phanh khet hen a luah.

¹² A kulhnâk dâi tla zei rangah na râwk? A kiang kaltu zawng nih grep chu an fîr kho awt.

¹³ Ngal tla nih an râwk lai le, ramsa tla nih an ei lai.

¹⁴ Zeizawng tikho, Pathian, kanmah lei hawng a her! Vân thawk hen hawng kan zauh le, hawng le, na mi tla ruangsuah na!

¹⁵ Hi grep zûn na phun mi hi hawng le, hum rawh, hi grep keuh na erh mi hi thungâi a bir!

¹⁶ Kan mêlma tla nih mei hen an duah le, an hâu ving, na thinrunhnâk hen zauh na le, veih na!

¹⁷ Na phun thîm tla chak tak hen na siam na mi chu, kilkâwi hen zauhkhenh na.

¹⁸ Zeiliau khawm ah kan kaltâk dah lai lo rawh; nung hen hawng kan zuah le, ka nan sawr lai.

¹⁹ LALPA Pathian, Zeizawng tikho, hawng kan kîrtir nawlh le, na khuaruatnâk hawng kan muhtir le, ruangsuak hen kan um lai.