SAM 79 - Bawm Common Language Bible Version

Phun Tla Ruangsuahnâk Thlachamnâk

¹ Pathian, lunglo tla nih na ram an rûn. Na Biakin thenhlimh tla chu an nawmh hen Jerusalem chu râwk dep hen an mâk.

² Na mi tla ruak chu ruaklâwm rangah an mâk le, na to-aw ruak tla chu ramsa ei ding ah an mâk.

³ Na mi tla thisen chu tî hâwi hen an suaktir le; tîlian hâwi hen Jerusalem khua lakah a luang le, âukhawm ruak vûitu ding an um lo.

⁴ Hawng kan kulhtu phun tla nih hawng kan nihsanh le, hawng kan zauhnawmh.

⁵ LALPA, kan lakah na thin a run awt kumza na maw? Na thinrunhnâk chu mei hâwi hen a kâng vima awt na maw?

⁶ Nangmah a nan sawnh lotu phun leiah na thinrunhnâk suah le, nangmah sinah thlacham lotu minung tla tlûnah chun.

⁷ Na mi tla an thah hen; na ram tla an râwk ruangah.

⁸ Kan thlâktu tla sual ruangah hawng kan rêp lah. Kan lungumnâk zawzawng kan thlâu ver rawh; tuah kan tlûnah khuaruat.

⁹ Pathian, zah na kâinâk ruangah hawng kan ṭangpi le, ruang hawng kan suah; hawng kan hum le, kan sual tla hawng kan ngaihdam.

¹⁰ Zei rangah phun tla nih, “Zeiah nan Pathian?” hawng kan ti zia lai. Na to-aw tla thisen suahtu phun na rêp na mi chu hawng kan muhtir.

¹¹ Rêngtlâ rûm hâu chu ngâi le, thi ding hen an mawhtir na mi chu na thiltikhonâk hen suah na.

¹² Nangmah zauhnawmh hen a nan nawmhtu phun tla chu vei sarih khirh na, LALPA.

¹³ Churawhchun, kannih, na mi tla, na dawrâ rual nih lâwmthu kan sim kumza hen tik hawng tlung ding zawng lak khawm an nan sawr lai.