SAM 78 - Bawm Common Language Bible Version

Pathian Leh A Mi Tla

¹ Ka mi tla, ka nan sîntir na mi lakah hin ngâi ule, thu ka sim mi hi ngâi u.

² A lânah kan pa le nih hawng kan simh le,

³ kan theih mi tla chu finghnâk mang hen thil thup tla chu ka simhfiang lai.

⁴ LALPA rokualnâk leh a thilti rokual tla, thilchê a ti mi tla chu kan fa le tla lakah pheh lo hen thlâk hawng um ding mi sinah khawm kan simh na lai.

⁵ Israel mi tla sinah dân tla a pêk na hen Jakob thlâk tla chu thupêk a pêk na. Kan thlâktu tla chu dân thu tla an fa tla sîntir na ding hen a simh na le,

⁶ churawhchun thlâk hawng um ding mi nih an châwng khonâk ding leh an fa tla an simh singsuan kho na ding hen.

⁷ Hi hâwi hen Pathian lakah an lungnâk ngauh ding hen leh a thilti tla chu an philh lonâk ding hen, a thupêk tla an zûl kumzanâk ding hen.

⁸ An thlâktu tla nih an hel le, ê-aw ngâilo mi leh bir tak a Pathian zumhnâk nei lo mi, a lakah zumhkâilo mi hâwi an silonâk ding hen.

⁹ Efraim thlâk tla chu, chanhtiang leh a thalzum tla mang hen tuknâk ni ah an tek.

¹⁰ Pathian hen an thutiam tla chu an tleih lo le, a dân thu zûl ding khawm an êl.

¹¹ A thilti leh thilchê a ti mi an muh mi tla khawm an philh.

¹² An thlâktu tla nih an chawnh liauah Aigupta ram ah Zoan phâi ah Pathian nih thilchê a ti.

¹³ Tipi chu a ṭhen le, a lanpi na; tî tla chu vâm hâwi hen a dîrtir.

¹⁴ Sûn ah chun sûm hen a rui na le, zân ah chun khuadei ver hen meichêu hen a rui na.

¹⁵ Ramkaro ah lungpi a kaktir le, a sung thawk hen tî a pêk na.

¹⁶ Lungpi thawk hen tinung a suaktir le, tiva hâwi hen a luangtir.

¹⁷ Sikhawmsele Pathian lakah an sual nget le, ramkaro ah Chungnungchem lakah an hel.

¹⁸ Buh an duh mi hauh hen Pathian an nik.

¹⁹ Pathian kalh hen “Pathian nih ramkaro ah buh a pêk kho lai mazei?

²⁰ Lung a vuak hen tî a hawng suak mi chu a dik ma chu, sikhawmsele a mi le tla hi sang leh meh a pêk kho lai ma?” an ti.

²¹ Churuang chun LALPA nih a theih rawh chun a thinthawk le, mei hen a mi tla chu a rêp na le, an lakah a thinthawknâk chu a zual,

²² anmah ruangsuah ding hen amah chu an zumh lo ruang leh an lunglo ruangah.

²³ Chung vân leiah thu a sim le, a khâr tla awng ding hen thu a pêk.

²⁴ Vân thawk sang a pêk na, manna ei ding hen a pêk na mi chu.

²⁵ Churawhchun, vânmifial tla ei mi an ei rawh; an duh ri Pathian nih a pêk na rawh.

²⁶ Saklei mi thli lêng ding hen thu a pêk le, a thiltikhonâk hen simlei mi thli khawm a thawktir;

²⁷ a mi tla sinah chun va tla a fial le, tiva kapah sep tluk a tam hen;

²⁸ An kulh lâi ah puanin kiang tla ah chun an tlâ.

²⁹ Churawhchun, zapi tla nih an ei rawh chun an khim rawh, Pathian nih an duh mi tak chu a pêk na rawh.

³⁰ An duh mi chu tâwk tilo hen an duh nget rih, an ei nget rih.

³¹ Pathian an lakah a thinrun le, an mi chak chem tla a thah le, Israel lakah an tlangvâl ṭha chem khawm a thah na.

³² Thilchê tla ti menza khawmsele amah chu an zumh lo le, an sual nget rih.

³³ Churuangah an san chu a dawnghtir le, an nungnâk chu siatnâk hen lâkkhatko ah a dawnghtir.

³⁴ An lakah zeimaw mi a thah na tik zawng ah a dang tla chu a sinah anna pêk lai le, an rim hen lungnâwng tak hen a sinah thla an cham lai.

³⁵ Pathian chu anmah humtu asi mi leh zeizawng tikho chu anmah ṭangpitu asi ti an theih rawh.

³⁶ Sikhawmsele an thu tla chu âwkrâwl hep asi le, an sim mi zawng tla chu zumh a kâi lo.

³⁷ A lakah an diklo le, an thutiam lakah zumh an kâi lo.

³⁸ Sikhawmsele Pathian nih a mi le tla tlûnah khua a ruat. An sual a ngaihdam le, a veih na loh. Vei tam tak a thinthawknâk a lêt hen â sûm.

³⁹ Thi kho mi minung cho an si zia leh thli a hawng lêng le, a kal ving mi hâwi cho an si zia a theih na.

⁴⁰ Ramkaro ah a lakah an hel tâwn le; vei tam tak a lung an sitir tâwn lo!

⁴¹ Pathian chu an nik lemang le, Israel Pathian Thenhlimh chu a lung an fâktir.

⁴² A thilti rokual hen an mêlma lakah mi a hum na mi tla an philh.

⁴³ Chun, a chaknâk thil leh thilchê a ti mi tla chu Aigupta leh Zoan phâi ah a langh.

⁴⁴ Tiva tla chu thisen ah a changtir le, Aigupta mi tla nih tî din ding an nei lo.

⁴⁵ An lakah thovâi a fial le, chu nih chun hamhnâk a pêk na, chu-uh tla nih chun an ram a râwk.

⁴⁶ Khâubawk tla chu an thlâi râwk ding leh an lo râwk ding hen a fial.

⁴⁷ An grep zûn tla chu rial hen a râwk piak na le, an theipi kûng tla chu vûr hen a râwk piak na.

⁴⁸ An ran tla chu rial hen a thah piak na le, an ranrual tla chu ṭêk hen a thah piak na.

⁴⁹ A thinthawknâk leh a thinrunhnâk fâk tak a hawng fial mi nih chun hamhnâk fâk tak a pêk na.

⁵⁰ A thinthawknâk â sûm lo, an nungnâk khawm a zuah piak na lo, râi hen a thah na.

⁵¹ Aigupta dâwngsungkhur kip ah an fa tîr chem a thah na.

⁵² Churawhchun, a mi tla chu dawrâ vêngtu hâwi hen a rui na le, ramkaro ah a lanpi na.

⁵³ Him tak hen a rui na le, an lâu lo; tipi chu dâisip hen an mêlma tla a khuh piak na.

⁵⁴ Ram thenhlimh ah amah ngelchel nih a neh mi tlâng leiah a kalpi na.

⁵⁵ A mi le tla mang hen ram luahtu tla chu a nar le; Israel phun tla a ṭhenh na, an in tla chu a mi le tla a pêk na.

⁵⁶ Khawmsele, zeizawng tikho Pathian lakah an hel le, an nik. A thupêk tla chu an zûl lo.

⁵⁷ Sikhawmsele an pa le tla hâwi hen an hel le, an diklo, thalzum ngâwi hâwi hen mang an tlâk lo.

⁵⁸ Lunglonâk sawnh dân nih a thin an thawktir le, an ruk sawnhnâk nih a thin an thawktir.

⁵⁹ Pathian nih a muh rawh chun a thinthawk le, a mi tla chu a lawnh tlak.

⁶⁰ Siloh ah a puanin kan lakah a umnâk chu a kaltâk rawh.

⁶¹ Thudântuk Bâwm, a rokualnâk leh a thiltikhonâk theihkumzanâk Bâwm chu kan mêlma tla nih lâk ding hen a siang rawh.

⁶² A mi le tla tlûnah a thinthawk le, an mêlma tla a thahtir na.

⁶³ An tlangvâl tla chu tuknâk ah an thah na le, an nungâk tla pakhat khawm pasal nei ding an tawng lo.

⁶⁴ An bâwlpu tla chu donâk ah an thi le, numei tla chu lungfâk ding hen an siang na lo.

⁶⁵ A dawnghnâk ah chun LALPA it mi chu mi chak uain nih a tha a thawktir mi hâwi hen a hawng a ṭhangh.

⁶⁶ A mêlma tla chu a khirh na le, ningzaknâk dawnghnâk hen a neh na.

⁶⁷ Sikhawmsele Josef thlâk chu a nawng le; Ephraim phun tla khawm a thîm lo.

⁶⁸ Juda phun leh Zion Tlâng a duhtak mi chu a thîm dauh.

⁶⁹ Chunah chun vân ah mi a in hâwi hen Biakin a sak; tual hâwi hen a birhtir le, zeiliau zawng ah a him kumza.

⁷⁰ A to-aw David chu a thîm le; mun ningno lakah mi chu a lâk,

⁷¹ a dawrâ vêngnâk mun ah mi chu Israel lalchem ah a siam, Pathian mi dawrâ vêngtu rangah.

⁷² David nih chun mah mâika siallo hen a kilkâwi na le, thiam tak hen a rui na.