SAM 77 - Bawm Common Language Bible Version

Tuar Liauah Lungngamnâk

¹ Hâu fâk tak hen Pathian ka auh le; a ka ngâi piak.

² Lawksawng ni ah LALPA sinah thla ka cham, thlacham hen khuadei ver hen ka kut ka phar le, khawmsele thlangamnâk ka tawng lo.

³ Pathian leikâng ka dawn liauah ka ngaih a sia le, ka dawn chun ka thinlung a dawng.

⁴ Zân khuavâr hen it lo hen hawng ka siam, Ka dî tuk le ka hawlh kho lo.

⁵ Ni a len vima mi chu ka ruat le, kum a vei rawh mi tla ka theihkumza.

⁶ Dawnnâk thûk tak hen zân ka mang, hi hi keimah thinlung hen ka dawn mi chu asi:

⁷ “LALPA nih hawng kan nawng kumza awt mazei? Kan lakah â lâwm nawlh awtlo ma?

⁸ Hawng kan dâwt awtlo rawh na maw? A thutiam a um awtlo rawh na maw?

⁹ Pathian nih khua a ruat awtlo rawh na maw? A zângfahnâk chu thinthawknâk nih ma a thlâk awt?” ti hen.

¹⁰ Churawhchun, “Ka thinlung a fâktir chem mi chu Pathian nih thil a ti kho lo rawh ti hi asi,” ka ti.

¹¹ LALPA, na thilti rokual chu ka theihkumza lai le; a lânah thilchê na ti mi khawm ka theih nawlh lai.

¹² Na thilti mi zawzawng ka dawnruat lai le; na thilti rokual zawzawng tla ka ruat lai.

¹³ Pathian, thil na ti mi zawng chu â thenhlimh, nang hâwi hen Pathian rokual âukhawm an um lo.

¹⁴ Nang chu thilchê titu Pathian na si; phun tla lakah na chak zia na langh.

¹⁵ Na mi Jakob leh Josef thlâk tla chu na thiltikhonâk hen ruang na suah na.

¹⁶ Pathian, tî nih an muh chun a nan ṭih hen, tipi thûk chu a thir.

¹⁷ Vândâwm nih ruah a sûrtir; vân ah khua a rî, mun kip ah mîmthlâ a lek.

¹⁸ Na khuarît nih chun a ṭawl le, mîmthlalek nih laikûlh a cherh; tual a thir le, â nîn.

¹⁹ Tî tlingtlawk lakah na kal le; tipi thûk tak na tan. Sikhawmsele na keneh chu muh kho asi lo.

²⁰ Dawrâpu hâwi hen na mi tla chu hotu Mosi leh Aron hen na rui na.