SAM 76 - Bawm Common Language Bible Version

Nehtu Pathian Chu

¹ Juda ram ah Pathian chu, theih hen a um le, Israel ram ah a min chu zah hen a um.

² Jerusalem ah in a nei le, Zion Tlângah a um.

³ Chunah chun mêlma thalzum tla a khiak piak na le, an phaw leh an nâmsâu khawm, asi, an riamnam zawzawng khawm.

⁴ Pathian, na rokual ngâk a! Na mêlma na neh na mi tlâng thawk hen na hawng kîr liau chun na rokual châwk a!

⁵ An kawrsen râlṭha neih zawzawng chu an suh piak hep na le; tu chun mithi itnâk ah an it hep le; an chaknâk leh an thiamnâk zawzawng chu mang a tlâk lo rawh.

⁶ Jakob Pathian, anmah tla na ṭhih na liauah, rang leh a tlûnah â chuan mi tla tlû hen an thi.

⁷ Sikhawmsele, LALPA, mikip nih nang chu an ṭih. Na thinthawk liau chun na mâika ah âukhawm an dîr kho lo.

⁸ Vân thawk hen na lâirêlnâk chu na theihtir le;

⁹ Tual tlûnah nâuneh hen um mi ruangsuah ding hen na thawk le, lâirêlnâk na phuang liau khan, laikulh chu a ṭih le, a dâisip.

¹⁰ Minung tla thinthawknâk chu nangmah sawr tawngnâk cho asi.

¹¹ LALPA na Pathian rangah na tiamh mi chu pêk rawh; a kiangkam ah phun zawzawng tla a sinah thilpêk hawng put u. Pathian nih minung tla amah ṭih ding hen a siam na;

¹² anna zûm mi lal fapa tla a nâutir na le, lal rokual tla a ṭhih na.