SAM 74 - Bawm Common Language Bible Version

Phun Tla Suahnâk Ding Hen Thlachamnâk

¹ Pathian, zei rangah hi hâwi hen na kan kaltâk? Na mi le tlûnah hin na thin a run kumza awt na maw?

² Hun sâwt tak na tâ siding hen na thîm na mi tla leh nangmah mi siding hen sal na suah na mi chu theihkumza. Veikhat na umnâk Zion Tlâng chu theihkumza.

³ Kan mêlma tla nih Biakin ah mi thil an râwk ver mi hi hawng ṭawl.

⁴ Nan mêlma tla nih nan Biakin ah nehnâk ting hen an âu, nehnâk puanzâr chu chunah chun an thlâi.

⁵ Tumun ah mi thing hâutu nih an reitlung hen thing an hâu mi an bangh.

⁶ Thing tlêng inkhâr tla chu an reitlung leh tukboh hen an râwk ver.

⁷ Na Biakin tla chu an râwk le, an duah hep; nangmah an sawnhnâk mun tla chu an nawmh.

⁸ Râwk dep ding hen hawng kan duh le, ram lakah mun thenhlimh chu an duah hep.

⁹ Kan singsiahnâk thenhlimh tla chu a vei rawh; khuavâng pakhat khawm an relh lo, hi hi zeitiang a sâwt awt âukhawm nih an theih loh,

¹⁰ Pathian, zeitiang riamruam me kan mêlma tla nih a nan nihsanh awt? Na min chu zungzâl hen an simsiat awt na maw?

¹¹ Zei rangah ṭangpi ding na kan duh lo? Zei rangah na kut dunglei ah na siah ving?

¹² Sikhawmsele, Pathian, nang chu a tîr thawk hen kan lal na si le, vei tam tak ruang na kan suah.

¹³ Na chaknâk hen tipi chu na ṭhentir le; tî minung lû tla chu na thlawngh.

¹⁴ Leviathan lû chu na niamh le, a taksa chu ramkaro sa tla châwmnâk ah na mang,

¹⁵ Tinungva leh tikhur na luangtir, tivapi tla na kangtir,

¹⁶ Sûn leh zân na siam le; nî leh thlâ chu anmah mun ah na siah na;

¹⁷ tual chu a ri na siam le, busik leh ṭhâlpini na siam,

¹⁸ Sikhawmsele, LALPA, na mêlma nih an nihsanh mi theihkumza le, Pathian neilotu tla leh nangmah siarlotu an si zia khawm theih.

¹⁹ Na mi le an mêlma tla lakah mi ṭangpi herh tla chu kaltâk lah; na mi nehsawh hen an um mi tla philh na lah!

²⁰ Kan lakah na thudântuk chu theihkumza, ram ken a mûi mi kip ah rawknâk a um,

²¹ Nâuneh hen a um mi tla chu mualpho hen umtir lah na, ṭangpi ngâi leh mipâm tla nih an sawr seh.

²² Pathian, thawk le, na mawh lo zia thu sim! Pathian neilotu tla nih nî tlâk hen an nihsanh mi chu theihkumza na.

²³ Mêlma tla thinthawk hen an âu mi chu philh lah le, na leido rihâu suah vima mi khawm philh lah.