SAM 73 - Bawm Common Language Bible Version

BU THUMNÂK (Sam 73-89) Pathian Lâirêl Diknâk.

¹ Pathian chu Israel thinlung thenhlimh tla tlûnah thungâi a ṭha.

² Sikhawmsele, ka zumhmaih le, ka lunglo dêngmâng,

³ misual tla sul-le-lam tluang ka muh hen anna zûm mi chu ka hua ruangah.

⁴ Annih tla chu nganfâk khawm an tawng lo le, an chak hen an ṭhisel.

⁵ Midang tla hâwi hen khawm an tuar lo; midang hâwi hen khawm an lawk a sawng lo.

⁶ Zûmnâk chu chikchîn hâwi hen anna awih, rawknâk chu nipuan hâwi hen anna aih;

⁷ an thinlung nih sualnâk a suah, an thinlung chu sual thilti tumnâk hen a khat.

⁸ Midang tla chu an nihsanh na le, thu ṭhalo tla an sim; anna zûm le, midang nauneh ding mi thu tla an sim.

⁹ Vân Pathian chu an sâwi le, tual ah minung rangah zauhnawmhnâk thupêk tla an pêk.

¹⁰ Churawhchun, Pathian mi tla tiang khawm anmah leikângah kawp hen an sim mi zawzawng thinlung thawk tak hen an lung khonâk ding hen.

¹¹ “Pathian nih a theih lai le, Chungnungchem nih a muh kho lai loh,” an ti.

¹² Hi hi misual tla duhkâng tak chu asi. Tamtak an nei le, an nei dadauh.

¹³ Asi chun, thenhlimh tak hen kilkâwi mi leh sualnâk ka ti lo mi hi zeikhawm asi lo bei ne?

¹⁴ Pathian, nî tlâk hen tuarnâk na ka pêk le, zing siar hen na ka rêp.

¹⁵ Chu hâwi thil ka ti asi chun, na mi le tla ti dân hen â bang lai loh.

¹⁶ Hi bang thil ti ding hi ka ruat tâwn le, sikhawmsele ka rangah a har tuktarâi,

¹⁷ na Biakin thenhlimh ah ka kal lânlo chu. Misual tlûnah a hawng tlung ding mi chu ka theihthiam rawh.

¹⁸ Annih tla chu mun nâl lakah na siah na lai le, siatnâk lakah na tlûktir na lai.

¹⁹ Lâkkhatko ah anna râwk dep le, dawnghnâk ṭihnungkâi ah an kal.

²⁰ LALPA, nangmah tak na hawng thawk rawh chun zînglei ah mang a vei mi hâwi hen an lang lo rawh.

²¹ Ka thinlung dawn a nuam lo liauah leh ka lungfâk liauah ramsa hâwi hen theihnâk ka nei lo le,

²² nang chu ka nan theih loh.

²³ Sikhawmsele, na kiangah ka um kumza le, na kut hen na ka tleih ko.

²⁴ Na remruatnâk hen na ka rui le, a dawnghnâk ah chun chawnglawmhnâk hen na ka ting lai.

²⁵ Nangmah lo chu vân ah zei thil dang ka nei mi a um? Nangmah ka nan tingnâk thawk hen tual ah zei thil dang me ka duh lai?

²⁶ Ka thinlung leh ka taksa hi chak lo khawmsele, Pathian chu ka chaknâk asi; zeiliau zawng ah ka herh kumza mi chu.

²⁷ Nangmah nih na kaltâk mi chu a vei ngelchel lai; na lakah mi zumhkâilo chu na veih na lai.

²⁸ Kei lam chu, na kiangah um hi thungâi chê ka ti le, LALPA, Chungnungchem zauhkhenhnâk ting ding leh a thilti phuang ding hen.