SAM 72 - Bawm Common Language Bible Version

Lal Rangah Thlachamnâk

¹ Pathian, nangmah repnâk mang hen lâirêl ding lal chu simh; nangmah diknâk chu pêk,

² Churawhchun, na mi le tla lakah diknâk hen lâi a rêl hen nehsawh a um mi tla chu repnâk hen lâi a rêl piak na lai.

³ Ram chu vân ṭhatnâk lakah a lâwm sele; repnâk chu theihthiam seh.

⁴ Lal nih mipâm tla chu ṭha tak hen lâirêl sele, ṭangpi ngâi chu ṭangpi sele, anmah nehsawhtu chu neh piak na seh.

⁵ Nî a chêu sung zawzawng chu na mi tla nih an sawr sele, hun hawng um ding mi rangah thlâ nih chêu a pêk kar vial chu.

⁶ Lal chu a lo lakah ruah a sûr mi hâwi leh ram lakah chî vawrh a tlâ mi hâwi si seh.

⁷ Repnâk nih chun a dam kar zawzawng chu ningnotir sele, vânṭhatnâk chu thlâ chêu kar zawzawng tiang si seh.

⁸ A lalram chu tipi thawk hen khatlei tipi tiang si seh, Eufretis thawk hen tual dawnghnâk tiang si seh.

⁹ Ramkaro mi tla chu a mâika ah an kûn lai le; A mêlma tla chu tual ah lawnh hen an um lai.

¹⁰ Spain ram lal tla leh tikulh ah um mi tla nih thilthawt an pêk lai le, Arabia leh Ethiophia ram mi lal tla nih thil ap ding an hawng put lai.

¹¹ Lal zawzawng a mâika ah an kûn lai le; phun zawzawng tla nih a nâwl an zulh lai.

¹² Amah auhtu mipâm tla chu ruang a suah na le, ṭangpi herh leh thlawrhthlâu hen an um mi tla khawm.

¹³ Mipâm leh mi chaklo chu a siherh na, ṭangpi herh mi tla nungnâk chu a hum.

¹⁴ Rawknâk leh nâunehnâk lakah mi chu ruang a suah na le, an nungnâk chu a rangah sung tak asi.

¹⁵ Lalchem chu dam sâwt seh! Arabia ram mi nih ngûn pêk na seh, zeiliau zawng ah a rangah thlachamnâk um seh, Pathian malsâwmnâk chu a lakah um kumza seh.

¹⁶ Ram ah chun fâng tam tak um seh; Lebanon tlâng ah a rah duh hâwi hen tlâng tla chu rah hen khat seh. Phâi belh hen a khat mi hâwi hen khuapi chu minung hen khat seh.

¹⁷ Lal min chu philh hen um lah sele; a min thangnâk chu nî a um kar zawng si seh. Phun zawzawng nih amah sawr sele, Pathian nih mal a sâwm na ding hen deih na sele, Lal rangah lâwptlonâk duh na seh.

¹⁸ LALPA, Israel Pathian chu sawr u, hi bang thilchê tla hi amah cho nih a ti.

¹⁹ A min rokual chu zungzâl hen sawr u, a rokualnâk nih tual zawzawng hi khattir seh. Amen! Amen!

²⁰ Hi hi Jese fapa David thlacham dawnghnâk asi.