SAM 7 - Bawm Common Language Bible Version

Diknâk Ding Hen Thlachamnâk

¹ LALPA, ka Pathian hum ding duh hen na sinah ka hawng kal; hawng ka ṭhawltu tla lakah mi chu hawng ka hum hen ruang hawng ka suah.

² Chu lo chun, âukhawm sanhtu umlonâk ah chakeibaknei hâwi hen an ka put ving lai le, an ka sâm dip lai.

^3-4 LALPA, ka Pathian, âu lak tal ah thil diklo ka ti asi chun, hâwi rangah ka tleihtir hen mawh, diklo tak hen ka tlûnah thil titu sinah khua ka ruat chun hi lakah a zei

⁵ mi tal ka ti asi chun, ka mêlma hawng ka ṭhâwltu tla nih hawng ka tleih sele, hawng ka tuk hen hawng ka thah sele; tual ah hin nungnâk nei lo hen hawng ka siah ko seh.

⁶ LALPA, thinrun hen thawk le, ka mêlma tla thinthawknâk ah hin hawng dîr; nangmah ngelchel thawk le, hawng ka ṭangpi! Diknâk chu na duhzia asi.

⁷ Mi zawzawng na kiangah pumh le, tlûnlei thawk hen an lâirêl piak na.

⁸ LALPA, nang chu mi zawzawng lâirêltu na si, ka umdân hâwi vima hen lâi hawng ka rêl piak. Thilsual ka ti lo zia na theih.

⁹ Nang chu Pathian rep na si le, kan dawn mi leh kan duhnâk tla lakah lâi na rêl. Misual tla sualnâk chu bângtir le, mi ṭha tla chu lâwmman pêk na.

¹⁰ Pathian chu hawng ka vêngtu asi; a thu ngâitu chu a hum na.

¹¹ Pathian chu lâirêltu rep asi le, misual tla chu a mawhtir tâwn.

¹² Mi an rim lo chun, Pathian nih a nâmsâu a tât lai le, chanhtiang kûk a kâu le, â tîm zet.

¹³ Thih khonâk riamnâm chu a lâk le, a chanhtiang thal zum hen a zâwn.

¹⁴ Misual nih sualnâk a dawn mi leh nawknâk leh perpetnâk an tum mi chu zauh.

¹⁵ Midang rangah thang an tunh mi nih anmah lehlam a awh na.

¹⁶ Anmah sualnâk nih anmah a rêp na le, anmah thilsual ti mi nih nganfâk a pêk na.

¹⁷ LALPA chu a diknâk ruangah lâwmthu ka simh le, Chungnungchem LALPA chu sawr hen la ka sak.