SAM 68 - Bawm Common Language Bible Version

Nehnâk Phun La

¹ Pathian chu a thawk le, a mêlma tla a rektir phin na. Amah huatu tla chu neh hen an tek phin.

² Meikhû sêm phin mi hâwi hen anmah tla chu a nar phin na; mei kiangah khuailul a zawr mi hâwi hen misual chu Pathian mâika ah an vei.

³ Sikhawmsele, mirep tla chu Pathian mâika ah anna lâwm le; lâwptlo leh lâwm hen an âu.

⁴ Pathian sinah la sak u, a min sawr hen la sak u, sûm tlûnah a to mi rangah lampi timhtuah u. A min chu LALPA asi, a mâika ah chun a lâwm u!

⁵ Biakin thenhlimh ah um mi Pathian nih chun, mi ngâkṭah leh numei tla a zauhkhenh na.

⁶ Mi riangvâi tla rangah umnâk in a pêk le, rêng an tlâ mi chu thawsuaknâk ah a kalpi na, sikhawmsele mi hel tla chu ṭiau tâk mi ram ah an um lai.

⁷ Pathian, na mi tla na rui na liauah, ramkaro nan kanh liauah,

⁸ tual chu â nîn le, vân nih ruah a sûrtir, Sinai Tlâng mi Israel Pathian na hawng ruangah.

⁹ Ruah tam tak na sûrtir le, na ram a dâwng rawh mi chu na thartir nawlh le;

¹⁰ na mi tla nih chun chunah in an sak; na ṭhatnâk hen mipâm tla rangah na pêk na.

¹¹ LALPA nih dân a pêk le, nunau tam tak nih thâwngthâng an put:

¹² “Lal tla leh an kawrsen tla an tek phin!” ti hen, In ah mi nunau tla nih an thil anna ṭhen;

¹³ Vaṭhu ruk tangkasa hen tuam mi, a thla ngûn ṭha hen lektir mi tla, (Zei rangah râl tuk liauah nan lakah mi zeimaw mi dawrâ kulh ah nan um?)

¹⁴ Pathian zeizawng tikho nih Zalmon Tlâng tlûnah lal tla a rektir na liauah chunah chun vûr a tlâ tir.

¹⁵ Basan tlâng chu tlâng rokual tak asi le, tlâng pâwng tam tak um mi asi!

¹⁶ Zei rangah na tlâng rokual thawk hen siarlo tak hen na zauh? Pathian nih tlâng sâng tak umnâk ding ah a ruat mi tlûnah chun, chunah chun LALPA a um kumza lai.

¹⁷ LALPA chu a rang kari chak sâng tam tak hen Sinai thawk hen mun thenhlimh ah a hawng kal.

¹⁸ Tlûnlei a sângnâk ah a sal tleih tam tak put hen a kâi le, thilpêk tla chu mi hel tla thawk hen a tawng. LALPA chu chunah chun a um lai.

¹⁹ Nisiar hen kan ritphurh phurhtu LALPA chu sawr u; amah chu ruang hawng kan suahtu Pathian chu asi.

²⁰ Kan Pathian chu ruangsuahtu Pathian asi; amah chu LALPA, thihnâk ah mi hawng kan humtu kan LALPA a si.

²¹ Pathian nih a mêlma sualnâk leikâng ti vimatu tla lû chu a khuai piak na lai.

²² LALPA nih chun, “Basan thawk hen na mêlma tla chu ka hawngpi na lai le; tisumsumriat thûk tak thawk hen ka hawng kîrpi na lai,

²³ churawhchun an thî lakah na nîm na lai le, na ui tla nih duh tâwk hen an liak lai,” a ti.

²⁴ Pathian, neh hen na kal mi leh na mun thenhlimh ka lal nih na ṭawl mi chu mi zawzawng nih an muh.

²⁵ La saktu tla chu mâilei ah, tumphung tumtu tla chu dunglei ah, nungâk khuangtê tumtu chu a lâi ah.

²⁶ “A mi le tla pumhnâk ah Pathian chu sawr ule; nannih Jakob thlâk zawzawng tla, LALPA chu sawr u!”

²⁷ A masa chem hen Benjamin, phun mêchem hawng, churawhchun Juda ruitu leh an murui tla hen, Zebulun leh Naphtali ruitu nih zûl na seh.

²⁸ Pathian Jerusalem ah na Biakin, lal tla nih lâwmman a nan pêknâk thawk hen kan ruangrûl ah

²⁹ na mang mi na thiltikhonâk chu zauhtir.

³⁰ Aigupta ram ah lâiluang nâwngah ramsa um mi chu nunsimh le, chawchal rual leh a fa tla chu rêp na. An tangkasa an pêk hen an ektê hen an kûn lânlo chu râltuk duhtu tla chu rek phin na.

³¹ Aigupta thawk hen mifial tla an hawng lai le, Sudan mi tla nih thlacham hen Pathian leiah an bân an phar lai.

³² Laikulh lalram tla, Pathian sinah la sak ule,

³³ LALPA, vân a lânah mi vân ah to mi chu la sak hen sawr u. Amah thu ngâi ule, hâu fâk tak hen âu u.

³⁴ Vân ah a chaknâk, Israel tlûnah a lalnâk; a Pathian thiltikhonâk chu phuang u.

³⁵ A mun thenhlimh thawk hen Israel Pathian a hawng kal liau chun ṭihnung a kâi a! A mi le tla sinah chaknâk leh thiltikhonâk a pêk. Pathian chu sawr u!