SAM 60 - Bawm Common Language Bible Version

Suah Ding Hen Thlachamnâk

¹ Pathian, nangnih na kan nawng hen na kan neh rawh; kan tlûnah na thin a run le, sikhawmsele tuah kanmah lei hawng a her nawlh.

² Ram chu na thirtir le, na phawngh; Tuah â ṭhen awt ver ruangah â liam mi mâ chu damh rawh.

³ Na mi tla chu fâk tak hen na tuartir na le; kan rî ruangah khatlei khatlei kan hâwr.

⁴ Mawhnâk lakah mi an suak khonâk ding hen a nan ṭihtu tla chu râlringnâk na pêk na.

⁵ Na dâwt mi tla chu ruang an suak khonâk ding hen hawng kan hum le, kan thlachamnâk sâng rawh.

⁶ Pathian nih a mun thenhlimh thawk hen, “Nehnâk ni ah chun Sekem mun chu ka ṭhen lai le, ka mi le sinah Sukot Kuam chu ka ṭhenhzâr na lai.

⁷ Gilead chu ka tâ asi le, Manaseh khawm; Ephraim chu ka lukhuh, Juda chu ka lal ṭhianṭhunh asi.

⁸ Moab chu ka ṭâwlnâk khêngah ka mang awt, Edom ram ah ka pheikawk ka lawnh lai, ka tâ asi rawh ti theihnâk ding ah. Philistia tla nih neh hen an ka âu nawh ding hen ma an ruat?”

⁹ Pathian, kulh bir ah âunih hawng ka siah lai? Edom ah âunih an ka kalpi awt?

¹⁰ Na kan nawng tatak mi masi? Kan kawrsen tla sinah na kal bâk awtlo ma?

¹¹ Kan mêlma lakah mi hawng kan ṭangpi, minung ṭangpinâk chu zeikhawm asi lo.

¹² Pathian kan kiangah um hen kan mêlma tla chu kan neh lai.