SAM 58 - Bawm Common Language Bible Version

Misual Rêp Ding Hen Pathian Sinah Thlachamnâk

¹ Nannih lâirêltu tla, dik tak hen thu nan thlûk tâwn ma? Nannih lâirêltu tla, mi zawzawng lâi ṭha tak hen nan rêl ma?

² Rêl lo e! sualnâk na ti kho mi karo na dawn le, ram tla nan râwk.

³ Misual tla chu umdân diklo leikângah an kal le; an suaknâk thawk hen âwkrâwl thu an sim.

⁴ Rûl hâwi hen tûr hen an khat. Sawkmuk nasêt hâwi hen an nâ ah theih ding an duh lo.

⁵ Chubang tla nih chun rûl lêmtu hâu leh dâwithiam dâwi hâu khawm an ngâi duh loh.

⁶ Pathian, hi bang chakeibaknei râng hâ tla hi khiak piak na.

⁷ Tî a dat ving mi hâwi hen an lang lonâk ding hen leh lampi ah belh a uai mi hâwi hen um na seh.

⁸ Nêng lakah sawksawl a pil mi hâwi hen um na seh; fasêm chêu muhlo hen thi chia hen a suak mi hâwi hen um na seh.

⁹ An theih manh lan karah bua an thlawh mi hâwi hen um na sele, Pathian thinthawknâk nih an dam liauah ranh ving na seh.

¹⁰ Mirep tla nih misual rêp hen a um mi an muh tikah anna lâwm lai, misual tla thisen hen a kê chu a ṭâwl lai.

¹¹ Mi leh tla nih chun, “Mirep tla chu lâwmman pêk an si tak rawh, laikulh lâirêltu Pathian chu a um tatak ngâk,” an ti lai.