SAM 56 - Bawm Common Language Bible Version

Pathian Sinah Ngauhnâk Ding Hen Thlachamnâk

¹ Pathian, tuknâk ah ka um ruangah ka lakah khuaruat le; ka mêlma tla nih zeiliau zawng ah an ka nehsawh.

² Nî tlâk hen ka mêlma tla nih an ka do. Hawng ka dotu tla chu tam tak an si.

³ Zeizawng tikho LALPA, ka ningṭih liau chun nangmah lakah ka ngauh.

⁴ Pathian lakah ka ngauh le, ka ningṭih lo, A thutiam ruangah ka sawr. Minung salam nih zei a ka ti kho lai?

⁵ Nî tlâk hen ka mêlma tla nih ka lawk an sawngtir le, nganfâk pêk ding karo an ka tum.

⁶ Mi muhlonâk ah anna pûm le, thil ka ti mi kip ah thah ding duh hen an ka bawh.

⁷ Pathian, hi minung tla hi na thinthawknâk hen rêp na le, neh na.

⁸ Ka lawksawng zia chu na theih; ka mitthli tlâk singsiahnâk chu na kil le, na lasuibu ah rîn an silo ma?

⁹ Ka nan kawh ni ah chun, ka mêlma tla chu an kîr hep lai.

¹⁰ LALPA a thutiam ka sawr mi chu ka kiangah Pathian a um ti ka theih.

¹¹ Pathian lakah ka ngauh le, ka lâu rerêng lai lo. Minung salam nih zei an ka ti kho lai?

¹² Pathian, thu kan tiamh mi hâwi hen kan pêk lai;

¹³ thihnâk ah mi ruang na ka suah ruangah leh neh hen ka um ding mi na ka hum ruangah lâwmnâk ka nan ap lai. Churuangah a nung mi cherhtu Pathian mâika ah ka kal.