SAM 51 - Bawm Common Language Bible Version

Ngaihdamnâk Ding Hen Thlachamnâk

¹ Pathian, na dâwtnâk dawnglo ruangah ka lakah khua ruat. Na khuaruatnâk rokual ruangah ka sualnâk chu nâwt dep!

² Ka diklonâk zawzawng ṭâwl le, ka sual lakah mi hawng ka thiangtir!

³ Ka diklonâk chu ka theih, ka sualnâk tla ka theihkumza.

⁴ Na lakah ka sual le, nangmah sin ngelchel ah ka sual, thilsual hen na ruat mi chu ka ti. Ka lakah lâi na rêl mi hi na dik asi; na ka mawhtir mi hi na dik asi.

⁵ Ka suak tîr thawk hen sual lakah ka um le; ka suak ni thawk hen sual lakah ka um.

⁶ Zumhkâi leh diknâk chu na duh mi tak asi, na finghnâk hen ka thinlung khattir rawh.

⁷ Ka sual hi kiangtir ving le, ka thiang lai; hawng ka ṭâwl le, vûr ngâk hen ka vâr lai.

⁸ Lâwmnâk leh lâwptlonâk hâu hawng ka theihtir le, hawng ka râwk hen hawng ka khiak dip khawmsele, lâwptlo hen ka um nawlh lai.

⁹ Ka sual tla lakah na mit sîm le, ka sual tla nâwt dep.

¹⁰ Pathian, ka lakah thinlung thenhlimh siam le, thlarau dik leh thar ka lakah siah.

¹¹ Na lakah mi chu hawng ka lawnh lah le; ka sin thawk hen na thlarau thenhlimh lâk ving lah.

¹² Na ruangsuahnâk lâwmnâk hawng ka pêk nawlh le, ê-aw ngâi ding hen hawng ka siam.

¹³ Na thupêk tla chu misual tla ka sîntir na lai le, churawhchun nangmah leiah anna hawi nawlh lai.

¹⁴ Pathian, ruang hawng ka suah le, ka nungnâk hi zuah, na repnâk chu lâwm tak hen ka phuang lai.

¹⁵ LALPA, thu sim ding hen hawng ka ṭangpi le, ka nan sawr lai.

¹⁶ Bâwlnâk tla duh le, ka nan pêk ding mi, duah mi thil ap lakah khawm na lâwm lo.

¹⁷ Pathian, ka bâwlnâk chu thinlung nâunâk asi, Mi â nâutir mi leh thinlung ah rim mi chu na nawng lo.

¹⁸ Pathian, Zion chu dâwt le, ṭangpi, Jerusalem kulh chu dirh nawlh.

¹⁹ Churawhchun, bâwlnâk dik tak lakah na lâwm lai le, duahphung bâwlnâk leh chawchal tla na mâichâm ah bâwlnâk tla lak khawm ah.