SAM 48 - Bawm Common Language Bible Version

Zion, Pathian Khuapi Chu

¹ LALPA chu thungâi a rokual le, a tlâng thenhlimh ah mi kan Pathian khuapi ah fâk tak hen chawnglawmh ding asi.

² Zion, Pathian tlâng chu a sâng hen â dawh le, Lal rokual khuapi nih chun laikulh zawzawngah lâwmnâk a tlungtir.

³ Khuapi kulhpi kulh sungah a sinah himnâk a um mi Pathian nih a langhtir.

⁴ Lal tla chu Zion Tlâng do ding hen anna pûm le, an hawng.

⁵ Sikhawmsele, an muh rawh chun chê an ti le; an ṭih le, an tek rang.

⁶ Nunau nganfâk tuar nau nei ding mi hâwi hen, thli fâk tak nih timeilawng a râwk hâwi hen,

⁷ ṭihnâk leh nganfâknâk hen chunah an thir.

⁸ Pathian nih zei a ti kan theih rawh, chun tuah Zeizawng tikho LALPA Pathian khuapi ah chu chu kan muh; khuapi chu zungzâl hen a vêng kumza lai.

⁹ Pathian, na Biakin sungah na dâwtnâk dawnglo chu kan dawn.

¹⁰ Mun kip ah mi nih an sawr le, na min thangnâk nih tual zawzawng a khattir. Rep tak hen lâi na rêl le,

¹¹ Zion mi tla chu a lawm na seh! Lâirêl ding hen thuneihnâk na pêk le; Juda khuapi ah chun lâwmnâk na umtir.

¹² Pathian mi tla chu Zion tlâng kiangah an kal le, Insâng tla an rêl;

¹³ A vâm tla chu an singsiah le, kulh tla chu an zauhdik rawh; churawhchun thlâk a um ding mi tla na simh kho na lai.

¹⁴ “Hi Pathian hi zungzâl kan Pathian asi; tik a hawng tlung ding mi zawng lakah hawng kan rui lai,” ti hen.