SAM 45 - Bawm Common Language Bible Version

Lal Umhnâk La

¹ Lal rangah hi la ka phuah liau hin ka thinlung chu thu ṭha hen a khat. Ka lei chu la phuah ding a tîm zet hen lasui rîn thiam kâwnglâwng fung hâwi asi.

² Nang chu mi mêlṭha leh mi thusim thiam tak na si; Pathian nih mal an sâwm kumza seh.

³ Lal chak tak, na nâmsâu pâi, nang chu na rokual hen na lal.

⁴ Repnâk leh thudik hum ding hen na nehnâk leh rokualnâk mang rawh; na chaknâk nih nehnâk rokual â ting lai.

⁵ Na thalzum tla chu a hâr le, mêlma thinlung tla a sunh le, phun tla na kê bul ah an tlû.

⁶ Pathian nih a nan pêk mi lalram chu zungzâl hen a um lai. Na mi le tla chu repnâk hen lâi na rêl lai.

⁷ Diknâk chu na duh le, sualnâk chu na hua. Churuangah asi, Pathian, na Pathian nih a nan thîm mi chu, Lal dang zawzawng ngâk hen lâwmnâk tam dauh an pêk.

⁸ Murrah leh aloe rimthâw hen na nipuan a nam. Sâi hâ hen thawmh mi lal in chu thil riphung tumtu tla nih an lawmh.

⁹ Na in ah nungâk tla lakah mi chu lal fanu tla an si, chun na laltophah vawrhlei kângah lalnu chu ngûn ṭha chem hen â thuam le, a dîr.

¹⁰ Lal nupi, ka sim mi chu ngâi rawh, na mi leh na unau tla chu philh na.

¹¹ Na dawhnâk nih lal thinlung a thawktir lai, amah chu na hotu asi, a thu na ngâi ding asi.

¹² Tura minung tla nih lâwmman an pêk lai le; minei tla nih an thinlung tawng anna zuam lai.

¹³ Lal fanu lal in sung ah mi chu â dawh chiam e! A kawrfual chu ngûn zâi hen siam asi.

¹⁴ A nipuan ṭial dawh kawrfual hen lal sinah an kalpi le, a hâwi tla nih an zûl, annih khawm lal sinah kalpi an si.

¹⁵ Lâwm leh lâwptlo bû hen an hawng le, Lal in sungah an lût.

¹⁶ Nang, ka bâwipa, an thlâktu tla mun luah ding hen fapa tam tak na nei lai le, laikulh zawzawngah lâirêltu ah na siam na lai.

¹⁷ Ka la nih chun zungzâl hen na min a thangtir kumza lai le, tik hawng um ding mi zawzawng lakah mikip nih an sawr lai.