SAM 42 - Bawm Common Language Bible Version

BU NIHNÂK (Sam 42-72) Mi Sal Tângnâk Ruangah Thlachamnâk

¹ Pathian, sakhi a tîhâl mi nih tiva mi tî kîk a duh hâwi hen, kan duhnâk hi a fâk asi.

² Nangmah Pathian duh hen ka tî a hâl; zei tikah na mâika ah hawng hen ka nan sawnh kho lai?

³ Sûn leh zân hen ka âu le, ka mitthli chu ka buh asi; Zeiliau zawng ah ka mêlma tla nih, “Na Pathian chu zeiah?” an ti.

⁴ A lânah mi zapi tla hen Pathian in leiah kan kal liau tla, zapi lâwptlo tla la sak leh Pathian sawr hen an âu mi tla ka theih zâwn chun ka thinlung a fâk tâwn.

⁵ Zei ruangah hi tluk rak hen ka ngaih a sia? Zei ruangah hi tluk rak ka lawksawng? Pathian sinah ka lungumnâk ka siah lai le, ka ruangsuahtu leh ka Pathian chu veikhat ka sawr nawlh lai.

^6-7 Ka sal tângnâk ah ka thinlung â râwk, churuangah amah leiah ka thinlung a kal; ngaihsiatnâk fâk tak ka thinlung ah a hawng umtir le, Hermon leh Mizar Tlâng thawk hen sâitâr tikhâwk leh tî liân mi hâu hâwi hen a ka tlirh le, Jordan Va lei a râwng.

⁸ Zân ah LALPA nih a dâwtnâk dawnglo chu hawng ka muhtir seh. Churawhchun, ka nungnâk Pathian sinah la ka sak hen thla ka cham khonâk ding hen.

⁹ Hawng ka vêngtu Pathian sinah “Zei rangah na ka thlawrhthlâu? Ka mêlma sual tak lakah zei rangah ka tuar kumza lai” ka ti.

¹⁰ Zauhnawmh hen an ka nâuneh le, “Zeiah me na Pathian chu?” an ka ti kumza ko.

¹¹ Zei rangah hi tluk rak hen ka ngaihsia? Zei rangah ka lawksawng? Pathian lakah ka lungumnâk ka siah lai le, ka ruangsuahtu leh ka Pathian chu ka sawr nawlh lai.