SAM 39 - Bawm Common Language Bible Version

Mi A Tuarnâk Ruangah Thutluangvâwrnâk

¹ “Ka thilti lakah ka thiamthih lai le, ka lei nih thilsual hawng ka titir lai loh; misual tla nih an ka naih liauah zei thu khawm ka sim awtlo,” ka ti.

² Thusim lo ding hen ka chîp thlir le, a ṭha leikâng thu khawm ah ka dâisip! Khawmsele, ka thil tuar lam chu a zual dadauh.

³ Lawksawngnâk nih hawng ka neh dep, ka dawn bilik leh ka lawksawngnâk a zual dadauh; deih lo hen ka um kho lo.

⁴ “LALPA, zeitiang me ka dam awt? Zei tikah ka thi awt? Ka san dawng ding mi khulrang hen hawng ka simh,” ti hen,

⁵ Ka san chu na tâwitir chiam e! Na mitmuh ah ka dam sung hi zeikhawm asi lo. Minung nungnâk hi thli lêng tluk khawm asi lo,

⁶ dâidul tluk khawm asi lo. A thilti zawzawng zeikhawm asi lo; âunih â ting awt ti theihlo thlo hen neih a khawng.

⁷ LALPA, zei me ka lungum ding asi lai ne? Nangmah lakah ka lungum.

⁸ Ka sual lakah mi ruang hawng ka suah le, mi â tla hawng ka nihsanhtir lah.

⁹ Zei thu khawm ka sim awtlo, ka dâisip awt, hi hâwi hawng ka tuartirtu chu nangmah dangâi na si ah.

¹⁰ Hawng ka rêp lah rawh! Na ka vuaknâk ah ka thi lebang lai.

¹¹ Na nunsimhnâk hen misual chu na rêp le, a duh mi chu vakrît hâwi hen na veih piak. Minung hi lung tlâk khawm asi lo ngâk!

¹² LALPA, ka thlachamnâk hi theih le, ka âu mi hi ngâi; ka ṭap tikah keimah ṭangpi ding hen hawng. Hawng ka thlâktu tla hâwi hen sâwtlotê karah na rangah khual cho kasi.

¹³ Um lo hen tlâu ving ka kal lânah, lâwmnâk zeimawh ka nei kho ding hen keimah lâwng hawng ka mâk.