SAM 38 - Bawm Common Language Bible Version

Mi A Tuar Mi Thlachamnâk

¹ LALPA, na thinrunnâk hen hawng ka rêp lah!

² Na thalzum hen na ka liamh le, lâwndêp hen na ka vuak

³ Na thinthawknâk ruangah fâk tak hen nganfâk ka tuar. Ka sual ruangah ka taksa pum hen a nganfâk.

⁴ Sual tî lian lakah ka tlâ le; phurh ding hen an rit tuktarâi.

⁵ Ka âtnâk ruangah ka mâ tla chu a thû hen a mân.

⁶ Ka kûn le, nganfâk hen ka um; nî tlâk hen ka tuar.

⁷ Râi hawng ka fanh le, thungâi ka zual.

⁸ Ka dî hen ka râwk dep; ka thinlung a nawk le, nganfâk tuar hen ka rûm.

⁹ LALPA, ka duh mi chu na theih; ka rûm mi tla khawm na theih.

¹⁰ Ka thinlung a tur le, ka chaknâk a vei. Ka mit nih khua chêu muhnâk a nei lo.

¹¹ Ka mâ ruangah ka inpa leh ka hâwi tla khawm ka sinah an hawng lo; ka dâwngsung tla men nih an hawng ka kaltâk ving.

¹² Thah ding hawng ka duhtu tla nih ka rangah thang an tunh le, nganfâk pêk ding an ka duhtu tla nih chun râwk dep ding hen an ka râl; an ka phiar mi an bâng lo.

¹³ Kei chu nasêt zeikhawm theih lo hâwi kasi, mi a hawlh kho lo mi hâwi kasi.

¹⁴ Mi a theih kho lo ruangah, a sâng kho lo mi hâwi kasi.

¹⁵ Khawmsele, LALPA, nangmah kan zumh le, nang, LALPA, ka Pathian nih na ka sâng lai.

¹⁶ Hamhnâk ka tawng mi lakah ka mêlma tla hawng ka diriamhtir lah le; ka tlû mi ruang hin a zûm lah na seh!

¹⁷ Tlû ding hen ka um le, ka ngan a fâk kumza.

¹⁸ Ka sual ka phuang le, ka lawk an ka sawngtir.

¹⁹ Ka mêlma tla chu an ṭhisel hen an chak le; a san lo thlo hen an ka huatu chu tam tak an si.

²⁰ Thil dik ti ka tum ruangah, thil ṭha thil sia hen an ka rulhtu tla nih an ka do.

²¹ LALPA, hawng ka kaltâk lah le, ka Pathian, lât takah um lah.

²² LALPA, ka ruangsuahtu, tuah hawng ka ṭangpi!