SAM 35 - Bawm Common Language Bible Version

Ṭangpi Ding Hen Thlachamnâk

¹ Hawng ka dotu tla chu do na le, LALPA, hawng ka sualpitu tla chu sualpi na!

² Na phâw leh na râlthuam lâk hen hawng ka sanh.

³ Hawng ka ṭhâwltu lakah na fei leh reitlung lirh le, ruang na ka suah ding mi hawng ka simh.

⁴ Thah ding hawng ka tumtu tla chu neh leh ningzak saih hen um na seh. Hawng ka dotu tla chu kîr hen zâm na seh!

⁵ LALPA vânmifial nih a ṭhâwl na ruangah fahi thli nih a ranh mi hâwi hen um na seh!

⁶ LALPA vânmifial nih a vuak na liauah an lampi chu mûi hen nâl seh!

⁷ A san lo thlo hen ka rangah thang an tunh le, ka rangah hawng ka tleih ding hen khur an chawh.

⁸ Sikhawmsele, an theihmanh lân karah siat leh râwknâk nih anmah tla a tleih na lai le; anmah thang nih a awh na hen anmah siatnâk ah an tlû lai!

⁹ churawhchun LALPA ruangah ka lâwm lai le; ruang a ka suah ruangah ka lâwptlo lai.

¹⁰ Ka thinlung tak hen LALPA sinah chun, “Nang hâwi hi pakhat khawm an um lo. Mi chak thawk hen mi chaklo ruang na suah, mi ngâkṭah chu nehsawhtu thawk hen ruang na suah.”

¹¹ Ran mawh va mawh ngâk a fing dauh hen, hawng kan finghtirtu Pathian leiah anna her lo.

¹² Ṭangpi ding hen an deih le, khawmsele Pathian nih a sâng lo, mi zûm leh misual an si ruangah.

¹³ An damlo zâwnah lungkham tak hen puan ka aih, buh ei lo hen ka um; ka lû kûn hen thla ka cham,

¹⁴ ka hâwi leh ka unau rangah thla ka cham mi hâwi hen. A nu ruangah a ngaihsia mi hâwi hen ngaihsia hen zîng ah kûn hen ka um.

¹⁵ Ka lawksawng liauah anna lâwm le, ka kiangah anna pûm le, an hawng ka pangpi; midang tla nih an ka vuak le, an ka huai.

¹⁶ Mi nih mikhêng an tluktlak mi hâwi hen hua hen an ka zauh.

¹⁷ LALPA, zeitiang riamruam me na thlawrhthlâu awt? An ka donâk ah mi ruang hawng ka suah le, hi bang chakeibaknei lakah mi ka nungnâk hi hum rawh.

¹⁸ Churawhchun, na mi le tla pumhnâk ah lâwmthu ka nan simh lai le, an mâika ah ka nan sawr lai.

¹⁹ Neh hen ka um mi lakah ka mêlma tla, mi âwkrâwl thusim tla nih hawng ka diriamh ding hen siang lah. A san lo hen an ka huatu tla nih ka lawksawngnâk lakah lâwm hen an ka imh ding siang lah.

²⁰ Hâwikawmh ṭha hâwi hen thu an ruat lo le, chu ngâk chun remnâk duhtu tla rangah âwkrâwl chikip an hâwl lehlam asi.

²¹ “Na ti mi kan muh set,” ti hen keimah phiar hen an âu!

²² Sikhawmsele, LALPA, nangnih hi hi na muh asi. Churuangah LALPA, dâisip lah le, lâtpi ah um lah!

²³ LALPA, thawk le, hawng ka vêng; ka Pathian, ka thu hawng ka sim piak.

²⁴ LALPA, nang chu mirep na si, ka mawhlonâk thu sim rawh; ka Pathian, ka mêlma tla hawng ka diriamhtir lah.

²⁵ “A lakah mi kan suak rawh! Chu lo ma kan duh mi!” titir lah na.

²⁶ Ka tuarnâk lakah hawng ka diriamhtu tla chu neh dep leh nawktir hen um seh. Keimah ngâk a ṭha dauh hen â rêl mi tla chu, ningzak leh mualphonâk nih khuh dep na seh.

²⁷ Hawng ka muh duhtu tla chu a lâwm na seh, “LALPA chu a rokual a! A to-aw dingchangnâk ah â lâwm,” ti hen lâwm hen âu lemang na seh!

²⁸ Churawhchun, na repnâk chu ka phuang lai le, nî tlâk hen ka nan sawr lai.