SAM 34 - Bawm Common Language Bible Version

Pathian Ṭhat Zia Sawrnâk La

¹ LALPA sinah lâwmthu ka sim kumza lai le, amah sawr ka bâng lai loh.

² A thilti ruangah amah chu ka sawr lai le; nâuneh hen um mi zawzawng tla nih ngâi hen a lâwm na seh!

³ LALPA rokualnâk chu ka sinah phuang ule; a min kan sawr rual lai!

⁴ Ka LALPA sinah thla ka cham le, hawng ka sâng; ka ṭihnâk zawzawng lakah mi a ka suah.

⁵ Nâuneh hen an um mi tla nih amah an zauh le, anna lâwm; Zeiliau khawm ah an lung a dawng lai lo.

⁶ Ṭangpitu nei lo nih amah chu an auh le, a sâng na; an lawksawngnâk lakah mi ruang a suah na.

⁷ LALPA ṭihtu tla chu a vânmifial nih a vêng na le, ningṭihkâi lakah mi a hum na.

⁸ LALPA ṭhat zia chu nangmah ngelchel nih theih rawh. Amah lakah himnâk tawngtu tla chu anna lâwm.

⁹ A mi zawzawng tla, LALPA ê-aw ngâi hen um u; amah ê-aw ngâitu tla nih chun an duh mi zawzawng anna ting.

¹⁰ Chakeibaknei chu a ei ding sam hen sungvâng hen a kal le, khawmsele LALPA ê-aw ngâitu tla nih chun thil ṭha zeikhawm an samphâng lo:

¹¹ Ka hâwi rualnâu tla, hawng ule, ka thu ngâi u, LALPA ṭih ding dân kan sîntir na lai.

¹² Nun nuam tak hen um ding na duh ma? San sâu leh lâwmnâk na duh ma?

¹³ Asi chun, thu sual sim leh âwkrâwl thu sim a sûm rawh.

¹⁴ Thilsual bângtak le, thil ṭha ti. Na thinlung zawzawng hen thlangamnâk tawng ding hen a ṭang rawh.

¹⁵ LALPA nih mirep tla chu a vêng na le, an âu hâu a ngâi piak na.

¹⁶ Khawmsele, thilsual titu tla chu a do na le, an thi tikah philh sawm an si kho ding hen.

¹⁷ Mirep nih LALPA a auh le, a ngâi piak; an lawksawngnâk ah mi ruang a suah na.

¹⁸ Mizer tla sinah LALPA chu a nâi; lungumnâk nei lotu tla chu ruang a suah na.

¹⁹ Mi ṭha nih nawknâk tam tak a tuar, khawmsele LALPA nih chubang nawknâk ah mi chu a hum.

²⁰ LALPA nih him tak hen a vêng; a ruh pakhat khawm khiak asi lo.

²¹ Sualnâk nih misual chu a thah; mirep huatu chu rêp asi lai.

²² LALPA nih a mi tla chu ruang a suah lai le, hum ding hen a sinah kaltu tla chu a zuah na lai.