SAM 32 - Bawm Common Language Bible Version

Thutluangvâwrnâk Leh Thlachamnâk

¹ A sualnâk ngaihdam a um mi leh a diklonâk ngaihdam hen a um mi chu a lâwptlo.

² Perpet mang lo leh LALPA nih mi diklo hen a ruat lo mi chu a lâwptlo.

³ Ka sualnâk ka phuang lo chun, nî tlâk hen ka ṭapnâk lakah ka dî thlo.

⁴ LALPA, nangnih sûn leh zân hen na ka rêp ruangah, ṭhâl khuarum nî sa nih thil nâwng a chârtir hâwi hen ka chaknâk â zûk hep.

⁵ Churawhchun, ka sual tla na sinah ka hawng phuang le; ka thilti diklo tla chu pheh lo thlo hen ka phuang. Na sinah thutluang vâwr ding hen ka tum, chun nangnih ka sual zawzawng na ka ngaihdam rawh.

⁶ Ṭangpi a herh ni ah na mi zumhkai tla nih thla an cham ding asi le, lawksawngnâk tî lian fâk tak a hawng tlung tikah a phanh na lai lo.

⁷ Nang chu ka thupnâk na si; nawknâk lakah mi na ka hum lai. Na ka vêng ruangah na ruangsuahnâk la hâu fâk tak hen ka sak.

⁸ LALPA nih chun, “Na kalnâk ding lampi, ka nan simh lai le; ka nan sîntir hen krai ka nan pêk lai.

⁹ Rang leh sanatung hâwi hen na lungkhungtir lah, chubang tla chu an thu thu a um ding hen an kâ ah thîr an barh,” a ti.

¹⁰ Misual chu tuar ding mi asi le, sikhawmsele LALPA lakah ngauh mi chu a dâwtnâk dawnglo hen a hum na.

¹¹ Nannih mirep tla, LALPA thilti ruangah chun Lâwptlo hen a lâwm u. Nannih ê-aw ngâitu tla, lâwm hen âu u!