SAM 31 - Bawm Common Language Bible Version

Pathian Sinah Ngauh Ding Hen Thlachamnâk

¹ LALPA, nangmah hum ding hen na sinah ka hawng. Zeiliau khawm neh hen hawng ka umtir lah. Nang chu Pathian rep na si; ka nan ngiar, ruang hawng ka suah.

² Hawng ka ngâi le! Tuah ruang hawng ka suah! Hawng ka hum ding hen ka kulh si rawh; ruangsuah ding hen hawng ka vêngtu si rawh.

³ Nang chu ka himnâk leh ka kulh na si; na thutiam hâwi hen hawng ka ruai hen hawng ka rui.

⁴ Keimah rangah thang an tunh mi lakah him tak hen hawng ka hum le; ṭihnungkâi lakah ka dawrnâk si rawh.

⁵ Nangmah zauhkhenh ding hen ka pêk. LALPA, nang chu Pathian zumhkâi na si ruangah na ka hum lai.

⁶ Diklo pathian tla sawnhtu chu na hua le, kei lam nih chun nangmah kan zumh.

⁷ Na dâwtnâk dawnglo ruangah lâwm hen ka lâwptlo lai. Ka tuar zia leh ka lawksawng mi na theih.

⁸ Ka mêlma na ka tleihtir lo; ka duhnâk zawng ah kal kho ding hen thawsuaknâk na ka pêk.

⁹ LALPA, lawksawngnâk ah ka um ruangah ka lakah khuaruat le, ka ṭap tam ruangah ka mit tla a zê le, ka kâ a tlêk.

¹⁰ Ka lawksawngnâk ruangah ka dî, ka ṭapnâk nih ka san a tâwitir, ka ruh tla khawm â râwk ver.

¹¹ Ka mêlma tla leh ka zâwlbâwm tla nih zauhnawmh hen an ka nehsawh. An ka muhtu zawng nih an ka ṭihṭanh le, khua lâi ah an ka muh khawmsele an ka tektâk ving.

¹² A thi rawh mi hâwi hen mikip an ka philh hep; thil lawnh ving mi hâwi kasi.

¹³ Ka mêlma tla nih an ka chawngawih mi ka theih le, ka kiangkam zawng chu ṭihnung a kâi. An ka do le, thah ding an ka tum.

¹⁴ Sikhawmsele, LALPA nangmah lakah ka ngauh, nang chu ka Pathian na si.

¹⁵ Nangmah zauhkhenh kumza mi kasi; hawng ka nehsawhtu leh ka mêlma tla lakah mi ruang hawng ka suah.

¹⁶ Na vêlneihnâk hen na to-aw hi zauh le, Na dâwtnâk dawnglo hen hawng ka hum.

¹⁷ LALPA, ka nan auh asi; mualpho hen hawng ka umtir lah. Misual chu mualpho hen um sele, laikulh thihnâk lakah dâidep hen kaltir na.

¹⁸ Mi zauhnawmh mang leh a zûm mi âwkrâwl thusim tla, mirep tla chawngawihtu tla chu bângtir na.

¹⁹ Nangmah an zahtu tla rangah thil ṭha na kil mi chu a chê chiam e! Na ṭhat zia leh nangmah a nan zumhtu chu na hum na zia mikip nih an theih.

²⁰ Minung phiarnâk lakah mi chu na mâika himnâk ah na thuh na le; an mêlma hen remlonâk lakah mi chu dawrnâk him takah na thuh na.

²¹ LALPA chu sawr u! Do leh kulh hen ka um liauah a dâwtnâk ka rangah a langh mi chu a chê a!

²² Na mâika mi nar ving hen ka um le, ka ning a ṭih hen ka dawn thlo. Khawmsele ṭangpinâk ka deih tikah ka âu mi a ka ngâi piak.

²³ A mi zumhkâi tla, LALPA chu dâwt u. Mi zumhkâi chu LALPA nih a hum le; mi â zûm mi chu anmah dêng vima hen a rêp na.

²⁴ LALPA rinhsanhtu tla zawzawng, chak tak leh râlṭha tak hen um u.