SAM 29 - Bawm Common Language Bible Version

Thlipi Lakah LALPA Aw-hâu

¹ Nannih vân mi tla, LALPA thiltikhonâk leh rokualnâk chu sawr u.

² LALPA min rokual chu sawr ule; mi Thenhlimh chu a hawng lang tikah a mâika ah kûn u.

³ LALPA aw-hâu chu tipi tla tlûnah theih hen a um le, Pathian rokual nih khua a rîtir le, a aw-hâu nih tisumsumriat a râwng.

⁴ LALPA aw-hâu chu a thiltikhonâk leh a lalnâk zawzawngah theih hen a um.

⁵ LALPA aw-hâu nih sidar thing tla a khiak le, Lebanon tlâng ah mi sidar thing tla chu a khiak.

⁶ Lebanon tlâng tla chu chawpê fa tla hâwi hen a pertir. Hermon Tlâng chu chawchal tuai hâwi hen a turtir.

⁷ LALPA hâu nih mîmthlâ a lektir.

⁸ A hâu nih ramkaro a ninh; Kades mi ramkaro chu a ninh.

⁹ LALPA aw-hâu nih oak thing tla a ninh, thing nah tla chu a thlawngh. A Biakin ah um mi tla nih chun “Pathian sinah rokualnâk um seh!” ti hen an âu.

¹⁰ LALPA nih chun tî thûk tak tlûnah Lalchem si hen zungzâl hen lâi a rêl.

¹¹ LALPA nih a mi tla chu chaknâk a pêk le, thlangamnâk hen mal a sâwm na.