SAM 28 - Bawm Common Language Bible Version

Ṭangpi Ding Hen Thlachamnâk

¹ LALPA, hawng ka vêngtu, ka nan auh asi. Ka âu hâu hi ngâi rawh! Na ka sâng lo chun laikulh thihnâk ah a kal mi sinah ka um lebang lai.

² Na Biakin thenhlimh leiah kut phar hen ṭangpi ka nan deih tikah hawng ka ngâi piak rawh.

³ Misual thilsual titu tla, an kâ chu mi kawmh thiam tak, khawmsele an thinlung ah huat mang tla sinah hawng ka mawhtir lah.

⁴ Thil an ti mi leh an thilsual ti ruangah rêp na. An thilti zawzawng ruangah anmah hen â dêng tâwk ding hen rêp na!

⁵ LALPA nih a siam mi leh thil a ti mi, anna theihtir lo; churuang chun zungzâl hen a veih hen a rêp na lai.

⁶ Ṭangpi ka ngiarnâk hawng ka ngâi piak ruangah LALPA chu sawr u.

⁷ LALPA chu hawng ka kiltu leh vêngtu asi ruangah ka zumh asi. Hawng ka ṭangpi le, hawng ka lawmhtir, lawmnâk la hen amah ka sawr.

⁸ LALPA nih a mi le tla chu a kilkâwi le, a lal thîm chu a hum le, ruang a suah.

⁹ LALPA na mi le tla chu ruangsuah na le, na tâ tla chu malsâwm na. An rangah dawrâ vêngtu si le, zungzâl hen vêng na.